Բրազիլացի դատավորը որոշել է արգելել տարածված բջջային Secret հավելվածը երկրում՝ հիմնավորելով, որ ծառայությունը թույլ է տալիս մարդկանց անանուն ծաղրը: Այդ մասին հաղորդում է Mashable տեխնոբլոգը:
Secret-ը թողարկվել է մոտ կես տարի առաջ Google-ի նախկին աշխատակիցների կողմից, թույլ է տալիս առանց անունի կիսվել «գաղտնիք»-հաղորդագրություններով: ԱՄՆ-ի սահմաններից դուրս գտնվող երկրների համար Secret-ը թողարկվել է մայիսի 21-ին և միանգամից մեծ համբավ է ձեռք բերել:
Դատավոր Պաուլո Սեզար դե Կարվալոն նախնական վճիռով պահանջել է հեռացնել հավելվածը Apple App Store և Google Play խանութներից 10 օրվա ընթացքում: Նա նաև պահանջում է ջնջել Cryptic ծառայությունը, որը թույլ է տալիս Secret-ի աշխատանքը Windows Phone պլատֆորմով: Վերջապես, դատավորը ցանկանում է, որպեսզի Secret-ը ջնջվի օգտատերերի սմարթֆոններից ու պլանշետներից: Secret-ի ներկայացուցիչները որոշումը չեն մեկնաբանել:
