Ամառային հանգստի ու ոսկեգույն մաշկի մասին երազում են շատերը:Սակայն չպետք է մոռանալ, որ արևայրուքները համարվում են առաջին կարգի այրվածքներ և կարող են լուրջ վնաս հասցնել մեր օրգանիզմին: Մաշկային հիվանդությունների առաջացման պատճառ կարող են լինել օրգանիզմում առկա տարաբնույթ փոփոխությունները՝ նյութափոխանակության խանգարում, նյարդային համակարգի դիզֆունկցիա, մարսողական համակարգի հիվանդություններ, արյան շրջանառության խանգարում, նաև իմունային համակարգի անկում:
Գոյություն ունեն մաշկային մի շարք հիվանդություններ՝ սնկայինից մինչ թարախաբշտիկային հիվանդություններ, նաև դերմատիտ, փսորիազ, քոս և այլն: Սեզոնայնությունը բնորոշ է շատ մաշկային հիվանդությունների: Հաճախ հանդիպող խնդիր է նաև կորյակային ցանը: Հատկապես ամռանը մաշկային հիվանդությունների սրումը պայմանավորված է արևի ճառագայթների ներթափանցելիության բարձրացմամբ, որի արդյունքում տեղի է ունենում գերքրտնարտադրություն: Մաշկը չորանում է՝ այդպիսով հարմար պայմաններ ստեղծում մաշկային այս կամ այն հիվանդության զարգացման համար:
Ամռանը զարգացող կամ սրվող մաշկային հիվանդություններից հնարավորինս խուսափելու համար նախ պետք է հասկանալ, թե ո՞ր արևից ե՞րբ և ինչպե՞ս ենք օգտվում: Մաշկը արևից պաշտպանելու համար անհրաժեշտ է օգտագործել արևապաշտպան քսուքներ: Եթե մարդն օգտագործում է արևապաշտպան քսուք, բայց էլի մաշկը վնասվում է, նշանակում է ընտրված միջոցը սխալ է: Արևից առավել շատ են վնասվում մաշկի, մազերի, աչքերի բաց գույն ունեցողները:
Արևից մենք կարող ենք ստանալ օրգանիզմին անհրաժեշտ վիտամին D, սակայն կան դեպքեր, երբ արևի ներգործությունն ունենում է վատագույն հետևանք: Դրանք այն դեպքերն են, երբ մարդու մոտ առկա է որևէ տեսակի նորագոյացություն. այսպիսի մարդկանց արևի տակ մնալ պարզապես անթույլատրելի է: Մաշկի քաղցկեղի՝ մելանոմայի զարգացման համար ամառվա արևն իր ուլտրամանուշակագույն ճառագայթներով համարվում է ռիսկային գործոն: Նույնիսկ վաղ տարիքում ստացած արևայրուքը հետագայում կարող է լուրջ խնդիրներ առաջացնել:
