Ադրբեջանի նախագահի վարչակազմի շենքի մոտ ամուսնական զույգն ինքնահրկիզվել է, հայտնում է haqqin.az-ը:
39-ամյա Էլչին Ալիմուրադօղլին և նրա կինը՝ 32-ամյա Ժալյա Սալախովան, ինքնահրկիզման են դիմել՝ ի նշան Սումգաիթում իրենց տունը քանդելու դեմ բողոքի:
Ամուսինները տարբեր աստիճանի այրվածքներով տեղափոխվել են քաղաքային №5 հիվանդանոցի այրվածքաբանության կենտրոն: Ժալյա Սալախովայի վիճակը գնահատվում է ծանր, նա վերակենդանացման բաժանմունքում է:
haqqin.az-ը նշում է, որ ամուսինները 3 տարեկան աղջիկ ունեն:
Էլչին Ալիմուրադօղլիի քույրը haqqin.az-ի թղթակցին ասել է, որ ամուսինների ինքնահրկիզման որոշման պատճառը եղել է ոչ թե նրանց տունը քանդելը, այլ ընտանիքին տնից հանելն ու փոխհատուցում ստանալու անհնարինությունը:
Նրա խոսքով՝ իր եղբայրն օրինական ճանապարհով տունը գնել է իր բարեկամ Աբուզարից: Երբ բարեկամը մեկնել է Ռուսաստան, պարզվել է, որ տան նկատմամբ մի քանի մարդ հավակնություն ունի՝ տունը վաճառողի քույրերն ու եղբայրները, որոնք նրան դատի են տվել:
Դատարանին Ալիմուրադօղլիի ներկայացրած փաստաթղթերը ոչ իսկական են ճանաչվել: Դատարանը տունն ազատելու և Ալիմուրադօղլիի ընտանիքին 14 000 մանաթ փոխհատուցում տալու որոշում է ընդունել:
Սակայն Աբուզարի հետնորդները չեն վճարել գումարը: Դատարանը Ալիմուրադօղլիից պահանջել է մեկ ամսվա ընթացքում ազատել տունը, իսկ հիմա նրանք ապրելու տեղ չունեն:
Նա նաև պատմել է, որ եղբայրը՝ Էլչին Ալիմուրադօղլին, Ղարաբաղյան պատերազմի վետերան է:
haqqin.az-ի թղթակցի տեղեկացմամբ՝ Ադրբեջանի նախագահի վարչակազմի ներկայացուցիչը գնացել է հիվանդանոց՝ ամուսինների հետ հանդիպելու համար:
Հիմա նախագահականի ներկայացուցիչը խոսում է Էլչին Ալիմուրադօղլիի հետ: Հանդիպման մանրամասներ դեռ հայտնի չեն:
