2012թ. հունվար-հոկտեմբեր ամիսներին ՀՀ պետական բյուջե են մուտքագրվել շուրջ 19.8 մլրդ դրամ բնօգտագործման և բնապահպանական վճարներ` կազմելով հարկերի և տուրքերի 3.3%-ը: Նախորդ տարվա նույն ժամանակահատվածի համեմատ` նշված եկամուտներն աճել են 90.2%-ով (9.4 մլրդ դրամով)` հիմնականում պայմանավորված «Բնապահպանական և բնօգտագործման վճարների մասին» ՀՀ օրենքում, ինչպես նաև «Ընդերքի մասին» ՀՀ օրենսգրքում կատարված փոփոխություններով:
Համաձայն այդ փոփոխությունների` հանքարդյունահանողների կողմից նախկինում պետական բյուջե վճարվող բոնուսի, կոնցեսիոն վճարի, ինչպես նաև մետաղական օգտակար հանածոների արդյունահանման համար վճարվող բնօգտագործման վճարների և ռոյալթիների փոխարեն սահմանվել են ռոյալթիներ` որպես բնօգտագործման վճարներ: Ըստ ֆինանսների նախարարության՝ հաշվետու ժամանակահատվածում այս աղբյուրից ՀՀ պետական բյուջե է մուտքագրվել 10.8 մլրդ դրամ:
Նախորդ տարվա հունվար-հոկտեմբեր ամիսների համեմատ այլ հարկերը նվազել են 26.1% ով կամ 3.5 մլրդ դրամով` հիմնականում պայմանավորված օրենսդրական փոփոխություններով, որոնց արդյունքում հանքարդյունահանողների կողմից նախկինում վճարվող և այլ հարկային եկամուտներում հաշվառվող բոնուսի, կոնցեսիոն վճարի և ռոյալթիների փոխարեն սահմանված ռոյալթիները հաշվառվում են որպես բնօգտագործման վճարներ:
Այսինքն՝ ոլորտից գանձվող հարկերի իրական հավելումը միայն 7.3 մլրդ դրամ է: Մինչդեռ, տարբեր գնահատականներով, այս ոլորտի պոտենցիալը մինչև 1 մլրդ դոլար է: