Շիրակում, հատկապես վերջին տարիներին, դրական տեղաշարժ կա` 3000 անօթևանների համար բնակարաններ են կառուցվել: Շիրակի մարզպետ Աշոտ Գիզիրյանն «Առաջին լրատվական»-ի հետ զրույցում հայտնեց, որ այսօր ՊՆ-ի կողմից նորակառույց շենքի բնակարանամուտն է տոնվել, 33 ընտանիք բնակարան ստացավ:
«Դա շարունակական բնույթ է կրում: Գիտեք, իրականացվել են «Մուշ 1» և «Մուշ 2» ծրագրերը, և Գյումրիում մոտ 400 բնակարան դեռ պետք է կառուցվի: Բացի այդ, գյուղական բնակավայրերում շինարարությունը շարունակվում է»,- ասաց մարզպետը:
Ըստ նրա՝ 24 տարի անց «աղետի գոտի» հասկացությունն ավելի շատ ասվում է, քան իրականում կա, որովհետև այս գոտին այժմ համարվում է ավելի շատ շինարարական գոտի, ու թեև խնդիրներ կան, բայց աշխատանքներ են տարվում:
Մարզում հանքարդյունաբերության զգալի աճը (մոտ 90%) Ա. Գիզիրյանը պայմանավորեց հանրապետությունում շինարարության զարգացմամբ:
«Գյումրիում գործազրկության առավել բարձր մակարդակը նույնպես կապված է աղետի գոտի լինելու հետ: Դա ոչ միայն Գյումրիում է` ամբողջ հանրապետությունում կա գործազրկութուն: Մեզ մոտ շատ է, բայց վերջին շրջանում շինաշխատանքների հետ կապված` և «Մուշ 1», և «Մուշ 2» ծրագրով, և պահուստային ֆոնդից հատկացված գումարներով 2800 շինարարներ էին աշխատում: Ճիշտ է՝ ծրագրի ավարտի հետ աշխատատեղերի մի մասը կվերանա, բայց ընթացքում տեղական իշխանությունները՝ ի դեմս քաղաքապետի, ինձ, եթե կարողանան շահագրգռել հանրապետությունից դուրս ապրող շիրակցիներին` ներդրումներ կատարել, տեղաշարժ կլինի: Կարևորն այն է, որ դաշտն ազատ լինի, և արհեստական խոչընդոտներ չլինեն»,- ասաց Ա. Գիզիրյանը:
Անդրադառնալով արտագաղթի խնդրին, որը Շիրակում մեծ ծավալների է հասել, Գիզիրյանը նկատեց, թե ինքը չի կարող ասել՝ մի գնացեք, եթե մարդիկ գնում են աշխատանք փնտրելու. «Աշխատանքի բացակայության հետ կապված` գործազրկության տոկոսը բարձր է: Ի դեպ, խորհրդային տարիներին էլ էին գնում. մարդիկ գնում էին արտագնա աշխատանքի: Դա ընդհանուր խնդիր է հանրապետությունում, նաև Շիրակի մարզում է տարածված»:
