Հակաքադաֆիական կոալիցիայի անդամ երկրները չեն կարողանում համաձայնության գալ ընդհանուր զինվորական հրամանատարության շուրջ: Այս ամսին հաղորդում է BBC-ն: Երեկ երկար քննարկումներից հետո ՆԱՏՕ-ի անդամ երկրներն այդպես էլ չեն կարողացել պարզել, թե որոնք են առաջնային վտանգ ներկայացնող օբյեկտները: Այդ պատճառով հարվածները Լիբիային ստացվում են բավականին հախուռն, քանի որ յուրաքանչյուր երկիր ինքնուրույն է որոշում ընդունում այս կամ այն օբյեկտը ռմբակոծելու վերաբերյալ: Քննարկումները շարունակվելու են այսօր:
Այդուհանդերձ կոալիցիոն երկրները շարունակել են երեկ ռմբակոծությունները: Al-Arabia հեռուստաալիքը նախ տեղեկացրել էր, որ ուժեղ ռմբակոծության է ենթարկվել Քադաֆիի նստավայրը Տրիպոլիում, ապա ճշտել էր, որ ռմբակոծվել է Աջդաբիայում երկրի ղեկավարի նստավայրը: Երեկ Քադաֆիի զորքերին հաջողվել է գրավել Աջդաբիայի արևմտյան և արևելյան մուտքերը: ապստամբների դեռ չի հաջողվում հետ մղել Քադաֆիին սատարող ուժերի հարվածները: Այս մասին հաղորդում է Reuters գործակալությունը:
Երեկ բրիտանացի փոխմարշալ Գրեգ Բեգուելը հայտարարել է, որ Լիբիայի ռազմաօդային ուժերը և հակաօդային պաշտպանության համակարգը ամբողջությամբ շարքից հանվել են և դրանք այլևս ինքնուրույն միավոր չեն Քադաֆիին սատարող ստորաբաժանումների շարքում: Ըստ փոխմարշալի` դաշնակից երկրների ինքնաթիռները կարող են հանգիստ թռչել Լիբիայի օդային տարածքում: Բեգուելը նաև ասել է, որ հիմա կոաիցիայի ռազմաօդային ուժերի ողջ ուշադրությունը սևեռված է ցամաքային զորքերը շարքից հանելու խնդրի վրա:
