ԱՄՆ-ի նախագահ Բարաք Օբաման հինգշաբթի երեկոյան վառել է Ազգային եղևնու լույսերը:
«Դե ինչ, բոլորը պատրա՞ստ են»,- ասել է ամբողջ ընտանիքով միջոցառմանը եկած Օբաման:
«Մենք վառում ենք Ազգային սուրբծննդյան եղևնու լույսերն արդեն 90 տարի շարունակ: Խաղաղության և պատերազմի, ողբերգությունների և հաղթանակների ժամանակ, մենք միշտ հավաքվում էինք միասին, որպեսզի ուրախանանք Սուրբ Ծննդի հրաշքին»,- ասել է Օբաման:
Նա նշել է, որ չնայած Սուրբ Ծնունդն ուրախ ժամանակ է, բայց շատ ամերիկացիներ այսօր ծանր շրջան եմ ապրում:
«Կարևոր է հիշել, թե ինչ է մեզ սովորեցրել Քրիստոսը՝ տալը ավելի օրհնյալ է, քան վերցնելը, և որ ամենահասարակ շնորհները բերում են ամենամեծ ուրախությունը: Միշելի, Մալիի, Սաշայի, տատիկի և Բոյի (շան) անունից ես կուզեի ձեզ յուրաքանչյուրիդ շատ երջանիկ Սուրբ Ծնունդ և խաղաղ տոներ մաղթել»,- հավելել է Օբաման:
Օբամայի նախագահման տարիներին սա արդեն երրորդ ազգային եղևնին է, այն տնկել են Սպիտակ տան հարևանությամբ այգում վերջերս՝ հոկտեմբերին: Առաջինը, որը կանգուն է մնացել 30 տարի, կոտրվել է 2011թ-ի փետրվարին: Մյուսը տնկվել է 2011թ-ի գարնանը և կանգուն է մնացել ընդամենը մեկ տարի՝ չկարողանալով դիմանալ տեղափոխմանը:
