Սաուդյան Արաբիան 1 մլրդ դոլար է հատկացրել Լիբանանի բանակին, որը Սիրիայի հետ սահմանին կռվում է գրոհայինների դեմ: Այս մասին չորեքշաբթի օրը հայտնում է Agence France-Presse-ը՝ հղում անելով Լիբանանի նախկին վարչապետ Սաադ Հարիրիի հայտարարությանը:
«Աբդալլա թագավորն ինձ տեղեկացրեց Լիբանանի բանակին ու ազգային անվտանգության զորքերին 1 մլրդ դոլարի չափով ֆինանսական օգնություն փոխանցելու իր մեծահոգի որոշման մասին, որպեսզի մեծացվեն նրանց հնարավորությունները Լիբանանի անվտանգության պաշտպանման հարցում: Մենք ստացանք այդ օգնությունը»,- գործակալությանը տված հարցազրույցում ասել է Հարիրին:
Լիբանանի բանակի և «Ջեբհաթ ան-Նուսրա», «Իսլամական պետություն» և այլ ահաբեկչական խմբավորումների միջև մարտերը սկսվել են օգոստոսի 2-ին, երբ զինվորականներն Էրսալ շրջանում ձերբակալեցին «Նուրսայի» մի քանի կողմնակիցների, որոնց թվում էր դաշտային հրամանատար Իմադ Ահմեդ Ջումաան:
Իսլամիստները հարձակվել են անցակետերի վրա և ներխուժել Էրսալ քաղաք, բայց բանակը կարողացել է հետ մղել նրանց գրոհներն ու բոլոր դիրքերը նորից վերահսկողության տակ վերցնել: Լիբանանի բանակի հրամանատարը նշել է, որ ձերբակալված դաշտային հրամանատարը խոշոր գործողություն է պատրաստել լիբանանյան զորքերի դեմ, և «նրա ձերբակալությունը խափանեց բոլոր հանցավոր ծրագրերը»:
Երկուշաբթի Լիբանանի բանակը հայտարարել է, որ ռազմական գործողությունների մեկնարկից ի վեր զոհվել է 14 զինծառայող, 89 զինվոր վիրավորվել է, 22-ը համարվում են անհետ կորած, հավանաբար՝ նրանց գերի են վերցրել:
