Առաջիկա երկու տարիներին Մեծ Բրիտանիայի պաշտպանության նախարարության ծախսերը կկրճատվեն 735 մլն ֆունտով: Ինչպես հաղորդում է Defense News-ը՝ այս մասին հայտարարել է երկրի ֆինանսների նախարար Ջորջ Օսբորնը: Նրա խոսքով՝ 2013 թվականին ռազմական ծախսերը պետք է կրճատվեն մեկ տոկոսով, իսկ 2014-ին՝ երկու: Իշխանությունները գերատեսչությանը թույլ են տվել 2012-ի չծախսված բյուջետային միջոցները տեղափոխել 2013 թվական:
Ներկայում բանակցություններ են անցկացվում պաշտպանության և ֆինանսների նախարարությունների միջև՝ 2013-ի չծախսված բյուջետային միջոցները 2014 թվական տեղափոխելու վերաբերյալ:
Ընդհանուր առմամբ հաջորդ տարի բրիտանական ռազմական գերատեսչության ծախսերը կկրճատվեն 245 մլն ֆունտով (394.5 մլն դոլար), իսկ 2014 թվականին՝ 490 մլն ֆունտով: Այդ փոփոխությունները վերաբերում են միայն ենթակառուցվածքին և անձնակազմին առնչվող ծախսերին:
Փոփոխությունները չեն տարածվում ռազմական տեխնիկայի գնման վրա: 2013 թվականին Մեծ Բրիտանիայի ՊՆ-ին կտրամադրվի 34.1 մլրդ ֆունտ, իսկ 2014-ին՝ 33.5 մլրդ ֆունտ:
Պետական ծախսերի կրճատման գործող ծրագրի համաձայն՝ Մեծ Բրիտանիայի կառավարությունը 2011-2014թթ. ծրագրել է ռազմական ծախսերը նվազեցնել 8 տոկոսով՝ այդպիսով կրճատելով պաշտպանական բյուջեի դեֆիցիտը (38 մլրդ ֆունտ): 2012-ի մայիսին բրիտանական իշխանությունները հայտարարել էին, որ իրենց հաջողվել է հավասարակշռել ռազմական բյուջեն:
