Patriot հակահրթիռային համակարգի տեղակայումը հստակ ազդանշան է Սիրիային այն մասին, որ Թուրքիան վայելում է ՆԱՏՕ-ի իր բոլոր դաշնակիցների աջակցությունը: Այս մասին ասել է Հիլարի Քլինթոնը Բրյուսելում կայացած բրիֆինգի ժամանակ: Այս մասին հայտնում է Trend-ը:
Պետքարտուղարը նաև նշել է, որ Patriot զենիթահրթիռային համալիրները նախատեսված են միայն պաշտպանական նպատակների համար:
Թուրքիան նոյեմբերի երկրորդ կեսին դիմել էր ՆԱՏՕ-ին իրեն Patriot զենիթահրթիռային համալիրների տրամադրման խնդրանքով՝ Սիրիայի կողմից հնարավոր օդային հարձակումից պաշտպանվելու համար:
ՆԱՏՕ-ի անդամ 28 երկրների ԱԳՆ ղեկավարների մակարդակով խորհուրդը երեքշաբթի Բրյուսելում կայացած նիստում հավանության է արժանացրել Սիրիայի հետ Թուրքիայի սահմանին համալիրների տեղակայումը՝ հայտարարել էր ՆԱՏՕ-ի գլխավոր քարտուղար Անդերս Ֆոգ Ռասմուսսենը:
Թուրքական մամուլը գրում է, որ համալիրը նախատեսվում է տեղակայել երկրի հարավարևելյան Դիարբեքիր, Մալաթիա և Գազիանտեպ նահանգներում: Դրանք կղեկավարվեն գերմանական Ռամշտանում տեղակայված ՆԱՏՕ-ի բազայից:
Patriot զենիթահրթիռային համալիրներն արդեն 1991 և 2003 թվականներին տեղակայվել են Թուրքիայի տարածքում՝ առաջին և երկրորդ իրաքյան պատերազմների ժամանակ, սակայն չեն կիրառվել:
