Մինչև 2018-ը Porsche-ի մոդելային շարքը կհամալրվի ամենաքիչը 4 նոր մոդելով: Macan ամենագնացից և 918 Spyder հիբրիդային սուպերմեքենայից բացի` ընկերությունը մտածում է 911-ից ավելի մեծ սուպերմեքենայի մասին: Նախկինի պես անորոշ է Porsche Panamera-ի «փոքր եղբոր» թողարկումը:
Porsche-ում մինչ այժմ քննարկում են Pajun կոչվող նախագիծը. այսպես է կոչվում Porsche Panamera-ի «փոքր եղբայրը»: Ինչպես ընկերության ղեկավար Մատիաս Մյուլլերն ասել է Automotive News գործակալությանը` դրա թողարկման հնարավորությունը դեռ կա, սակայն վերջնական որոշում դեռ չի ընդունվել: Թե երբ կորոշվի նախագծի ճակատագիրը` Մատիաս Մյուլլերը չի ճշգրտել, սակայն ակնարկել է, որ Pajun-ը կմրցակցի Mercedes E-class-ի և BMW 5 Series-ի հետ: Ավելի վաղ հայտնում էին, որ կրտսեր Panamera-ն շուկայում կհայտնվի 2016-ին:
Panamera ընտանիքը մոտակա տարիներին պետք է համալրվի «կուպե» բեռնախցիկով տարբերակով, իսկ սպորտային ոնիվերսալի արտադրությունից, Automotive News-ի հաղորդմամբ, որոշվել է հրաժարվել: Panamera մոդելը լրջորեն կվերաոճավորվի արդեն հաջորդ տարի:
Porsche-ի մոդելային շարքում ևս մեկ սպորտային մեքենա կարող է տեղ զբաղեցնել 911 և 918 Spyder մոդելների միջև: Սպորտային մեքենայի մշակման համար ծրագրվում է օգտագործել VW-ի ճարտարապետությունը: Այսպիսով՝ ապագա պոտենցիալ Porsche-ն հարթակ կբաժանի Lamborghini Gallardo-ի և Audi R8-ի նոր սերունդների հետ:
Նշենք, որ Porsche-ն հրաժարվել է նաև Boxster-ից ավելի կոմպակտ, միտեղանոց, բաց վերնամասով ավտոմեքենայի արտադրությունից:
