Newscorp մեդիակոնցեռնն աշխատում է բջջային հարթակների համար նորությունների սեփական հավելված ստեղծելու ուղղությամբ: Այս մասին հայտնում է The Financial Times թերթը՝ հղում անելով տեղյակ աղբյուրի:
Պարբերականը գրում է, որ նոր հավելվածում հատուկ հավելվածի համար արված՝ պարբերաբար նորացվող ռեպորտաժները կհամադրվեն News Corp-ի այլ պարբերականների, օրինակ՝ The Wall Street Journal-ի նյութերի հետ: Հավելվածի թողարկման մասին որոշումը կընդունվի առաջիկ մի քնաի շաբաթում, հայտնել են աղբյուրները:
Հավելվածի հիմնական նպատակը կլինի ընթերցողների նոր սերնդի ներգրավումը, որը մեծացել է համացանցի նոր դարաշրջանում և տպագիր պարբերականներ կարդալու սովորություն չունի:
News Corporation-ը միջազգային մեդիակորպորացիա է, որը 1979 թ. հիմնել է մեդիամագնատ Ռուպերտ Մերդոքը, որին են պատկանում 20th Century Fox հեռուստաընկերությունը, Fox News հեռուստաալիքը, BSkyB, Sky Deutschland, Sky Italia, Foxtel արբանյակային օպերատորները, Dow Jones տեղեկատվական գործակալությունը, News Outdoor գովազդային գործակալությունը, Wall Street Journal, Times, Sun և New York Post թերթերը:
