Գագիկ Ծառուկյանը համոզված է, որ 2012թ. խորհրդարանական ընտրություններում իր կուսակցությունը 50+1 տոկոս ձայն է հավաքելու, իսկ հանրապետական Ռաֆիկ Պետրոսյանն էլ ասել է` «Եթե 75 տոկոս չհավաքենք, 70-ը կա ու կա»: «Սոցիոմետր» սոցիոլոգիական կենտրոնի տնօրեն Ահարոն Ադիբեկյանի կարծիքով, այսօր ասել, թե 50+1 կամ 70 կլինի, դեռ վաղ է. «Նրանք պարզապես խնդիր են դրել կուսակցության առջեւ հասնելու այդ տոկոսներին, սակայն ես չեմ հասկանում` ինչպես է հնարավոր հասնել 50+1 արդյունքի այն պարագայում, երբ համայնքների ամեն յոթերորդի ձայներն է միայն ԲՀԿ-ն վերահսկում: Եթե մտածենք, թե կարելի է կաշառքով հասնել այդ արդյունքին, ապա կարծում եմ` այդքան գումար ոչ ոք չունի: Ճիշտ է, կաշառքները իրենց համեստ տեղն են գրավում ընտրապայքարում, սակայն դրանք չեն կարող 50+1 արդյունք ապահովել»:
Ադիբեկյանի խոսքերով, եթե Ծառուկյանը գրագետ գործի, ապա միայն այդ դեպքում կարելի է որոշել նրա ղեկավարած կուսակցության առավելագույն ձայները: