21,5 դյույմանոց մոնիտորով Apple iMac-ի նոր մոդելի գնորդները նկատել են վրան դրոշմված Assembled in USA («Հավաքած է ԱՄՆ-ում») գրությունը։ Ոչ թե համակարգչի, այլ նրա մի մասի վրա։ Հաղորդում է РИА Новости-ն՝ հղում անելով Fortune-ին։
Սա փաստում է, որ «խնձորային» ընկերությունը մասամբ արտադրությունը իրականացնում է ԱՄՆ-ում՝ դարձյալ շարունակելով համագործակցությունը թայվանյան և չինական գործընկերների հետ։
ԱՄՆ-ի դաշնային առևտրական հանձնաժողովի կանոններով՝ Assembled in USA լեյբլը կարող է դրվել միայն այն արտադրանքի վրա, որի արտադրության մի մասը տեղի է ունենում ԱՄՆ-ում,- նշում է AppleInsider-ը։ Այդպիսի նշում չի թույլատրվում, երբ արտադրանքի միայն «փաթեթավորման» մասն է կատարված ԱՄՆ-ում, և որևէ բան չի փոխվում այլ երկրում թողարկված ապրանքի մեջ։
Մայիսին գլխավոր տնօրեն Թիմ Քուքը հայտարարել էր, թե կցանկանար, որ Apple-ի արտադրանքները արտադրվեին ԱՄՆ-ում, սակայն չինական աշխատաշուկան բավական շահավետ պայմաններ է առաջարկում։
iMac 21,5 դյույմանոց դիսփլեյով նորացված համակարգիչ-մոնոբլոկի վաճառքը ԱՄՆ-ում սկսվել է անցյալ շաբաթվա վերջից։ 27 դյույմանոց մոդելը կհայտնվի վաճառասեղաններին դեկտեմբերից։ ԱՄՆ-ում 21 դյույմանոց iMac մոդելը, որի պրոցեսորը Core i5 է 2,7 ԳՀց հաճախականությամբ, 8 Գբայտ օպերացիոն հիշողությամբ և 1 Տբայտ կոշտ սկավառակով է, արժե 1299 դոլար։
Ամերիկյան մյուս ընկերություններն էլ են ցանկանում իրենց արտադրությունները Ասիայից մասամբ ԱՄՆ-ն տեղափոխել, սակայն դա առաժմ հաջողությամբ չի պսակվում։
Այսպես, Google պատրաստվում էր հայրենիքում պատրաստել ստացիոնար խաղարկիչ Nexus Q, սակայն դա դա թանկ նստեց։ Նախատեսվել էր վաճառել 299 դոլարով, որը նախորդ ամռանը պաշտոնական հաղորդագրության անժամկետ հետաձգման պատճառներից մեկը դարձավ։
