Դեկտեմբերի 3-ը Հաշմանդամների միջազգային օրն է: Հայաստանում հաշմանդամների, նրանց խնդիրների, քաղաքական և հասարակական կյանքում նրանց ներգրավվածության մասին զրուցեցինք «Ժառանգություն»-«Ազատ դեմոկրատներ» համատեղ համամասնական ցուցակի տասներորդ տեղում գտնվող, «Աշխարհն առանց արգելքների» ՀԿ նախագահ Արման Մուշեղյանի հետ: Վերջինս նշեց, որ այսօր հաշմանդամների խնդիրներով զբաղվում են միայն հասարակական կազմակերպությունները.
«Հասարակական կազմակերպությունների ներգրավվածությունն այսօրվա դրությամբ շատ մեծ է: ՀԿ-ների մեծամասնությունը՝ նրանք, որոնք ակտիվ են այս գործում, ղեկավարվում են կա՛մ հաշմանդամություն ունեցող մարդկանց կողմից, կա՛մ նրանց ընտանիքի անդամների կողմից՝ հաշմանդամ երեխաների ծնողների կողմից: Ինչ վերաբերում է հաշմանդամների մասնակցությանը քաղաքական կյանքին, ապա կասեմ այն, ինչ միշտ եմ ասել՝ եթե մենք չզբաղվենք քաղաքականությամբ, ապա քաղաքականությունը կզբաղվի մեզանով: ՀԿ-ների ղեկավարներն այսօր խուսափում են քաղաքական գործիչների հետ առնչվել, բայց իրականում նրանց աշխատանքն ուղղված է հենց քաղաքականությունը փոխելուն:
Եթե, իհարկե, ինձ կարող եք համարել քաղաքական գործիչ, ապա՝ այո՛, կարող ենք համարել ինձ քաղաքականության մեջ ներգրավված մարդ: Բայց եթե ինձ թողնենք մի կողմ, ապա կուսակցություններում տեսանելի դիրքերում չկան մարդիկ, ովքեր լոբբինգ կանեն, կպաշտպանեն հաշմանդամների իրավունքները և շահերը: Այդ պատճառով էլ պայքարը սկսվում է հասարակական կազմակերպություններից և ավարտվում մամուլի ակումբներում: Համենայնդեպս, աշխատում ենք միայն հասարակական կազմակերպությունների հետ, որովհետև եթե մեր երկրում ինչ–որ բան անում են, ապա անում են հասարակական կազմակերպությունները»:
Խոսելով հաշմանդամների խնդիրների մասին՝ Ա. Մուշեղյանն ասաց հետևյալը. «Ամենաառաջնային խնդիրն այն է, որպեսզի ոչ հաշմանդամ մարդիկ՝ այսինքն նրանք, ովքեր չունեն հաշմանդամություն և ովքեր որոշումներ են կայացնում՝ փորձեն փոխել իրենց մտածելակերպը: Սկսած մանկապարտեզից, ապա նաև դպրոցներում և բուհերում պետք է ներառված լինեն հաշմանդամություն ունեցող մարդիկ, որպեսզի ոչ հաշմանդամ մարդիկ իրազեկ լինեն: Իրազեկվածության պակաս կա մեր երկրում: Եթե ընդհանուր վերցնենք, ապա առաջնային խնդիրը հաշմանդամություն չունեցող մարդկանց իրազեկվածության պակասն է՝ հաշմանդամություն ունեցող մարդկանց հնարավորությունների հանդեպ»։
