News International ընկերության ղեկավար Թոմ Մոքրիջը հրաժարական կտա 2012 թ. վերջին: Այս մասին հաղորդում է France-Presse-ը՝ վկայակոչելով ընկերության սեփականատեր և մեդիամագնատ Ռուպերթ Մերդոկի հայտարարությունը:
Մերդոկի խոսքերով՝ Մոքրիջի հեռանալը կդառնա News Corporation համաշխարհային մեդիակորպորացիայի վերակառուցման գործընթացի սկիզբ: Ապագայում նախատեսվում է կորպորացիան բաժանել երկու մասի, որոնցից մեկը զբաղվելու է հեռուստատեսությամբ և շոու-բիզնեսով, իսկ երկրորդը վերահսկելու է տպագիր պարբերականները:
Մեկնաբանելով News International-ի ղեկավարի հրաժարական տալու մասին հաղորդագրությունները, Մերդոկը հայտարարել է, որ Մոքրիջն ինքն է հեռանալու մասին որոշում կայացրել: Որոշման դրդապատճառների մասին չի հաղորդվում:
Բրիտանական News International-ի տաբլոիդների աշխատակիցների հետ կապված սկանդալը ծագել էր 2011 թ.: Այդ ժամանակ պարզվել էր, որ News International-ին պատկանող News Of The World բրիտանական թերթի պատվերով մասնավոր լրտեսները հետևել են հայտնի մարդկանց, ահաբեկչական ակցիաների զոհերին և զինվորականների ընտանիքներին: Պարբերականի աշխատակիցները մեղադրվում են հեռախոսազրույցները գաղտնալսելու և պաշտոնավոր անձանց կաշառելու մեջ:
