Իտալական ավտոարտադրողը մտադիր է կամավոր կերպով հրաժարվել աճից՝ առնվազն քանակական։ Ընկերությունը արհեստականորեն կսահմանափակի իր ավտոմեքենաների վաճառքի ծավալը հանուն ոչ բոլորին հասանելի էքսկլյուզիվ բրենդի կարգավիճակի պահպանման։ Ճիշտ է, դա այնքան էլ շուտ չի լինի, տեղեկացնում է auto.vesti.ru–ն։
Ընկերության հայտարարությունում ասվում է, որ Maserati-ն համաշխարհային շուկայում տարեկան կվաճառի 75 հազար ավտոմեքենայից ոչ ավելի։ Ի դեպ, նման ծավալների իտալացիները մտադիր են հասնել 2018 թվականին։ 2015-ին Maserati-ի վաճառքները պետք է աճեն մինչև 50 հազար ավտոմեքենա տարեկան։
Համեմատության համար, անցած տարվա արդյունքներով, ընկերությունը ամբողջ աշխարհում իրացրել է 15 400 ավտոմեքենա։ Այնպես որ՝ 75 հազարի արհեստական սահմանափակումն այնքան էլ մեծ զոհողություն չէ։
Ընթացիկ տարվա արդյունքներով, Maserati-ն ակնկալում է կրկնապատկել իր նախորդ տարվա ցուցանիշը։ Առաջին հերթին՝ իր նոր, համեմատաբար ոչ թանկարժեք Ghibli մոդելի հաշվին. սեդանը ամենահասանելին է ապրանքանիշի մոդելային շարքում։
