Ուկրաինայում ստեղծված իրավիճակը դեռևս կպահպանվի. բազմաթիվ հարցեր կան, որ պիտի լուծում ստանան: «Առաջին լրատվական»-ի հետ զրույցում Ուկրաինայի Հայոց թեմի առաջնորդ Տ. Գրիգորիս արքեպիսկոպոս Բունիաթյանը նշեց, թե լուծման կարոտ շատ հարցեր կան, որոնք պիտի հերթով լուծվեն:
Անդրադառնալով Ուկրաինայից միգրացիոն շարժին, երկրից հեռանալու միտումներին՝ Սրբազանը նշեց, որ Ուկրաինայի միայն երկու մարզերի՝ Դոնեցկի և Լուգանսկի շրջանից են մարդիկ տեղափոխվում, մյուս շրջաններից՝ ոչ, ընդ որում՝ տեղափոխվում են թե՛ Ուկրաինայի այլ շրջաններ, թե՛ այլ երկրներ: «Նաև ուրիշ տարածքներ են գնում՝ կախված նրանից, թե որ ճանապարհն է ավելի հեշտ անցնել. ճանապարհների խնդիր է: Գնալու ընտրությունը մեծ չէ՝ Ռուսաստան և Ուկրաինա: Տեղափոխվում են նաև հարևան քաղաքներ՝ Դնեպրոպետրովսկ, Խարկով, Զապորոժյե»,- ասաց նա:
Հայաստանից տեղի հայ համայնքն օգնություն չի ակնկալում: Սրբազանի խոսքով՝ Ուկրաինայի հայությունը խնդիր չունի, օգնության հարց չկա, պարզապես ընդհանուր երկրի տնտեսությունն է բավական թուլացել, տկարացել, բոլորն էլ ինչ-որ չափով նեղության մեջ են, բայց հիմնականում այդ երկու մարզերի ժողովուրդն է զգում օգնության կարիք, նրանցից շատերն էլ արդեն դուրս են եկել, գնացել:
«Ովքեր մնացել են, երևի ամեն ինչի կարիք էլ ունեն, բայց հատկապես մեծ է ճանապարհների խնդիրը»,- ասաց նա:
Նրա խոսքով՝ այստեղ հայության նկատմամբ ընդգծված դրական կամ բացասական վերաբերմունք չկա: Տեր Գրիգորիսը նշեց, որ ամեն ինչ նույնն է, ինչ նախկինում. ամեն մարդ ապրում է իր հոգսերով ու խնդիրներով: «Բնական է, կան նաև հայեր, ովքեր ակտիվորեն մասնակցում են մեկ կամ մյուս կողմից, բայց դա հայերի նկատմամբ հատուկ վերաբերմունքի պատճառ չէ: Անշուշտ, դժգոհողներ կլինեն. եթե հայերից մեկը մի կողմին է հարում, մյուս կողմն անպայման դժգոհում, է, քննադատում է և այլն, բայց որ հայերի հանդեպ ինչ-որ հատուկ վերաբերմունք դրսևորեն, ենթարկեն հալածանքի, հարձակման թիրախ դարձնեն՝ նման բան չկա»,- ասաց նա:
Սրբազանը նշեց, թե Դոնեցկի և Լուգանսկի շրջաններում նաև հայերի շրջանում են եղել կորուստներ՝ թե՛ մարդկային, թե՛ նյութական:
