Մեզ ոչխարների պետություն պետք չէ. այսօր լրագրողների հետ հանդիպմանը նման միտք հայտնեց «Հայազն» միության անդամ, քաղաքագետ Արմեն Աղայանը. «Գլխացավանքներից հեռու մնալու պատճառով, ելնելով անձնական շահերից` 91 թվականի ղեկավարը Անկախության հանրաքվեի ժամանակ հոգ տարավ, որպեսզի Արցախը դրան չմասնակցի: Այսօր մենք կրում ենք դրա հետևանքները»:
Պատասխանելով այն հարցին, թե պետք չէ՞ արդյոք այսօր Ադրբեջանից օրինակ վերցնել և գոնե Արցախի անկախացման հարցում միասնական լինել, Ա. Աղայանն ասաց. «Ես դա համարում եմ շատ վատ օրինակ: Եթե ոչ միասնական ասելով նկատի ունենք տարբեր կարծիքների առկայությունը, ուրեմն այդպես էլ պետք է լինի: Մեզ ոչխարների պետություն պետք չէ, պետք է հայտնել տարբեր կարծիքներ, դրանք քննարկել և հետո գալ ընդհանուր եզրահանգման: Արցախը Հայաստանի մասն է, և դա ընդունում են անգամ ԵԱՀԿ Մինսկի խմբի համանախագահող պետությունները՝ Ֆրանսիան,ԱՄՆ-ը և Ռուսաստանը:
Մենք պետք է զիջումներ կատարենք: Արցախն անկախ հռչակելով` մենք կորցնում ենք տարածքներ: Որևէ այլ տրամաբանություն չկա: Հասկանալի է նաև, որ Արցախը Հայաստանից առանձին ի վիճակի չէ նոսր բնակչությունը սփռելով մեծ տարածքում` այն լիարժեք բնակեցնել:
Արցախին ոչ մեկը որպես բանակցային կողմ չի ընկալել: Նա չունի սեփական բանակ, այսինքն` լիարժեք պետություն չէ, ինչպե՞ս կարելի է նրան ընկալել որպես բանակցային կողմ: Մենք տուն-տունիկ ենք խաղում: Միակ հարցը, որ քննարկելի է՝ տարածքների խնդիրն է: Ասելով Արցախն անկախանա՝ նկատի են ունենում անկախանա Ադրբեջանից, ինչն էլ արդեն իսկ դավաճանություն է: Դա նշանակում է ընդունել, որ այն Ադրբեջանի մասն է կազմում»,- նշեց Արմեն Աղայանը:
Ասուլիսի մյուս բանախոսը՝ «Հայազն» միության վարչության անդամ Արմեն Մկրտչյանն էլ ասաց. «Մենք բավականին շատ ակցիաներ սկսեցինք այն հարցերով, թե արդյոք մենք հաշվի առնո՞ւմ ենք արցախցիների կարծիքը` այս խնդիր լուծելու համատեքստում: Այո, հաշվի ենք առնում, ասեմ ավելին՝ մենք արցախցիների սահմանադրական իրավունքների պաշտպանությամբ ենք զբաղվում: Նրանք, ցավոք սրտի, զրկված են համահայկական ընտրություններին մասնակցելու իրավունքից: Մենք այսօր փորձում ենք գոնե դա վերականգնել»:
