Նոյեմբերի 29-ին Ֆրանսիայի Սենատում կազմակերպվեց կլոր սեղան` «Լեռնային Ղարաբաղ. խաղաղություն և երկխոսություն» խորագրով:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ հանդիպմանը մասնակցել են Ֆրանսիայի Սենատի բարեկամական խմբի նախագահ Ֆիլիպ Կալտենբախի նախաձեռնությամբ պաշտոնական այցով Ֆրանսիայում գտնվող ՀՀ ԱԺ հայ-ֆրանսիական պատգամավորական բարեկամության խմբի անդամները, ֆրանսիացի սենատորներ, Սենատի պաշտոնյաներ, փորձագետներ և լրագրողներ:
Միջոցառումը բացել է բուլղար լրագրողուհի Ցվետանա Պասկալևան, որն, իբրև ականատես, հանդես է եկել պատերազմական իրադարձությունների մասին պատմող խոսքով, որից հետո ցուցադրվեց նրա` «Կբացվի՞ արդյոք առավոտը Ղարաբաղում» ֆիլմը:
Այնուհետև ծավալվել են քննարկումներ, որոնց ընթացքում ներկայացվեցին ԼՂ հիմնախնդրի պատմական և աշխարհաքաղաքական ասպեկտները, առանձին խոսքերով հանդես եկան ԵԱՀԿ Մինսկի խմբի նախկին համանախագահ Բերնար Ֆասիեն, ֆրանսիացի սենատորներ և հայ պատգամավորներ, ինչպես նաև պատմաբաններ ու փորձագետներ։
Կլոր սեղանի մասնակիցները կարևորեցին Արցախի ժողովրդի անվտանգությունը, խստորեն դատապարտեցին ռազմատենչ հայտարարությունները, ընգծեցին Սաֆարովի զարհուրելի դեպքի անընդունելիությունը` ինչպես զուտ մարդկային արժեքների, այնպես էլ տարածաշրջանում փոխվստահության հաստատման տեսանկյունից։
Բանախոսներն առանձնակի շեշտել են, որ այլընտրանք չի կարող լինել խաղաղությանը, և որ ներկայիս հրամայականն է նախապատրաստել հասարակություններին ոչ թե» պատերազմի, այլ` խաղաղության։
