Բնապահպան-ակտիվիստ Սամվել Հովհաննիսյանը դեպի Գառնի հեծանվաարշավ անցկացնելու ժամանակ նկատել է, որ բանվորները կոտրում են «Քարե սիմֆոնիայի» քարերը և տեղափոխում: «Առաջին անգամ տեսանք հոկտեմերի 21-ին, գնացինք գյուղապետի հետ ճշտելու, թե ինչ է կատարվում: Զարմացավ ու ասաց, որ դիմելու է ոստիկանություն: Իրոք դիմել էր՝ խնդրելով օգնել քարերի պահպանության կազմակերպմանը»,-«Երկիր Մեդիա» հեռուստաընկերության «Երկրի հարցը» հաղորդման եթերում ասել է բնապահպան-ակտիվիստը: Նա նշել է, որ ոստիկանություն ուղղված գյուղապետի դիմումից հետո՝ նոյեմբերի 26-ին գնացել են և տեսել, որ շարունակում են կոտրել. «Գյուղերում ասում են, որ մարդիկ բրիգադ են ստեղծել և մի քանի տարի կազմակերպված այդ գործն են անում, գնորդ են փնտրում և 5-6 հարյուր դրամով վաճառում են»:
Սամվել Հովհաննիսյանի խոսքերով՝ անհնար է, որ նման կազմակերպված գործ լինի, և առնվազն գյուղապետը կամ ոստիկանությունը չիմանան այդ մասին: Այդ վայրագությունը շարունակվում է 2007 թվականից ի վեր: 2007-ին հարցը բարձրացվել էր, ոստիկանությունը՝ հարուցել քրեական գործեր, բայց մինչ օրս որևէ մեկը չի պատժվել, ինչը բնապահպաններին հիմք է տալիս մտածելու, որ ինչ-որ մեկը հովանավորում է «Քարե սիմֆոնիան» աղավաղողներին:
«2008-ին կառավարությունը որոշում կայացրեց, և այն մտավ բնության հուշարձանների ցանկ: Այսինքն՝ դա հատուկ պահպանվող տարածք պետք է լինի, բայց մինչ օրս անձնագիր անգամ չունի: Գյուղապետն ասում է, որ չի կարող ամեն օր հսկել այդ տարածքը, գումարներ չկան»,- ասել է բնապահպանը՝ նշելով, որ թեև պահակներ կան Խոսրովի արգելոց-թանգարանում, սակայն նույն բարձիթողի վիճակն է նաև այնտեղ, որտեղ անխնա վերացնում են կենդանիներին:
Սամվել Հովհաննիսյանը նշել է, որ մեր երկրում մաքուր օդ ու շրջակա միջավայր ունենալու համար բոլորս ստիպված ենք դառնալ բնապահպան-ակտիվիստ:
