Թեև Հովիկ Աբրահամյանին վարչապետ նշանակելուց հետո շատ խոսվեց խնամիական-բարեկամական կապերը չօգտագործելու, գործարարներին ստվերից հարկային դաշտ բերելն իրենից և իր բարեկամներից սկսելուց, սակայն իրականությունը բոլորովին այլ բան է փաստում: Հովիկ Աբրահամյանն իր նշանակումից հետո ոչ միայն կանաչ լույս է վառել իր մտերիմների համար, տարբեր պաշտոնների նշանակել նրանց, այլև սկսել է, օգտագործելով իր կապերը, պատժել բոլոր նրանց, ովքեր կարող են այս կամ այն կերպ Հայաստանում թե արտերկրում խոչընդոտ հանդիսանալ իր, իր խնամու և մերձավոր օլիգարխիայի այլ ներկայացուցիչների բիզնեսի համար:
Օրերս մեզ հայտնի է դարձել մի դեպք, որը դրա վառ ապացույցն է: Հովիկ Աբրահամյանը, որոշելով ստանձնել խնամու բիզնեսի պաշտպանությունը և օգտագործելով Ռուսաստանում հայտնի գործարար Սամվել Կարապետյանի կապերը, հանձնարարել է այրել հայաստանցի մի գործարարի Ռուսաստանում պատկանող խոշոր գույք: Այդ գործարարը բիզնես ունի նաև Ռուսաստանում և իր գործունևությամբ կարծես թե խանգարում էր խնամիներին:
Երբ գույքն այրելուց հետո որոշ մանրամասներ են հայտնի դարձել հայաստանցի գործարարին, հիմա նրան հսկայական փող են առաջարկում, որպեսզի չհրապարակի կատարվածի վերաբերյալ ի հայտ եկած մանրամասները: Ընդ որում, առաջարկվող գումարը մի քանի անգամ գերազանցում է այրված գույքի արժեքը, սակայն գործարարը հայտարարել է, որ ինքը չի վաճառվի ոչ մի գումարի դիմաց և պատրաստ է գնալ մինչև վերջ և մերկացնել այդ դավադրության կազմակերպիչներին: Գործարարը նույնիսկ կարողացել է պարզել, որ իր գույքը ոչնչացնողն ուղիղ կապ ունի Սամվել Կարապետյանի հետ, իսկ ավելի կոնկերտ՝ նրա դասընկերն է եղել:
Ներկայումս այս գործով ռուս իրավապահները քրեական գործ են հարուցել, և քննություն է կատարվում: Մեր ձեռքի տակ է քննվող քրեական գործի մանրամասներն ու լուսանկարները:
Պատահական չէ, որ այդ գործում նրան աջակցում է Տաշիրի Սամոն, որի հետ Հովիկ Աբրահամյանն ու իր որդին՝ Գագիկ Ծառուկյանի փեսա Արգամ Աբրահամյանը, բիզնես գործընկերներ են նաև Ռուսաստանում: Մամուլում էլ գրվեց, որ Ռուսաստանի տարածքում նոր-նոր տեղադրվող գազալցակայանների բիզնեսը պատկանում է հենց վերը նշված անձանց: Կայացնելով այդ բիզնեսը Հայաստանում և տիրանալով գազալցակայանների հիմնական մասին՝ Հովիկ Աբրահամյանը ներթափանցել է նաև ռուսական շուկա, ինչը, բնականաբար, առանց Սամվել Կարապետյանի, հնարավոր չէր լինի:
Այս դեպքի հետ կապված մեզ հայտնի են լրացուցիչ մանրամասներ, որոնք ըստ անհրաժեշտության կհրապարակենք ավելի ուշ:
Լուսանկարը՝ Mediamax-ի
