Armenian Power հանցախմբի անդամներ՝ 36-ամյա Անգուս Բրաունը՝ հայտնի «Մարդասպան» մականունով, և 33-ամյա Արման Շարոպետրոսյանը՝ հայտնի «Ձի» մականունով, Կալիֆոռնիայի դաշնային դատարանի վճռով ճաղերի հետևում կանցկացնեն 25-ական տարի: Նրանց մեղադրում են անձնական տվյալների գողության օղակ կազմակերպելու մեջ: Գործով ևս 18 մարդ է անցնում:
Նրանց դեմ քրեական հետապնդում էր սկսվել Կալիֆոռնիայի Ավենալ քաղաքի բանտ մաքսանենգ ճանապարհով մտցված բջջային հեռախոսների կիրառմամբ Armenian Power հանցախմբին ղեկավարելու մեղադրանքով: Նրանք համակարգել են սոցիալական ապահովագրության համարների և անձնական այլ տեղեկությունների ձեռք բերման սխեմայում իրականացված խարդախ օպերացիան: Նրանք հարյուրավոր մարդկանցից միլիոնավոր դոլարներ են գողացել: Այս մասին հայտնում է SFGate-ը:
Նշենք, որ Բրաունը նախկինում դատված է եղել, այդ թվում՝ անձնական տվյալների գողության համար, իսկ Շարոպետրոսյանը 10 տարվա ազատազրկման պատիժն էր կրում բռնազավթված մեքենայի ուղղությամբ կրակ արձակելու և զենքի ապօրինի պահման համար: