Իսրայելցիների և պաղեստինցիների միջև ուղիղ բանակցությունները Մերձավոր Արևելքում երկարատև խաղաղության ձեռք բերելու միակ միջոցն է: Ինչպես հաղորդում է ITAR-TASS-ը, նման հայտարարությամբ Վաշինգտոնում հանդես է եկել ԱՄՆ պետքարտուղար Հիլարի Քլինթոնը:
Պետքարտուղարը քննադատել է ՄԱԿ-ի շրջանակներում Պաղեստինի կարգավիճակը բարձրացնելու պաղեստինցիների ձգտումները:
«Հարցի լուծման ուղին, որը կբավարարեր պաղեստինցի ժողովրդի ձգտումներին, անցնում է Երուսաղեմով և Ռամալլահով, այլ ոչ թե Նյու Յորքով»,- նշել է Քլինթոնը՝ նկատի ունենալով, որ ՄԱԿ գլխավոր-գրասենյակը գտնվում է ԱՄՆ-ի խոշորագույն քաղաքում:
Նրա խոսքերով՝ անկախ այն բանից, թե ինչ տեղի կունենա ՄԱԿ-ում, դա չի հանգեցնի այն արդյունքին, որին ձգտում է ԱՄՆ կառավարությունը և նախագահը:
Քլինթոնը կողմերին կոչ է արել խուսափել այնպիսի քայլերից, որոնք կարող են բարդացնել բանակցությունների ընթացքը:
Ինչպես ակնկալվում է, այսօր ՄԱԿ Գլխավոր ասամբլեայի նիստում քննարկվելու է Պաղեստինին պետություն դիտորդի կարգավիճակ շնորհելու հարցը:
