Եվրահանձնաժողովը (ԵՀ) հավանության է արժանացրել իսպնական չորս ազգային բանկերին՝ Bankia, Novagalicia, CatalunyaCaixa և Banco de Valencia, 37 մլրդ եվրոյի դրամական հատկացումը, որն իրականացվում է իսպանական բանկային ոլորտի վերակազմավորման ծրագրի շրջանակներում։ Այս մասին հաղորդում է Reuters- ը։
«Վերակազմավորման ծրագրին տրված հավանությունը Իսպանիայի և եվրոգոտու երկրների միջև հուշագրի իրացման կարևոր փուլ է»,- հայտարարել է ԵՀ փոխնախագահ Խոակին Ալմունիան։
2012 հուլիսին ԵՀ-ն հավանության էր արժանացրել բանկերի վերակազմավորման իսպանական ծրագիրը, որի շրջանակներում Իսպանիան եվրոգոտու իր գործընկերներից խնդրել էր 100 մլրդ եվրոյի չափով օգնություն՝ բանկային ոլորտի վերականգնման համար։
Ֆինանսական օգնությունը կհատկացվի եվրոգոտու հակաճգնաժամային հիմնադրամի (ESM) կողմից։ ԵՀ-ի կողմից իսպանական բանկերի վերակազմավորման համար միջոցների հատկացումը ենթադրում է, որ Banco de Valencia–ն պետք է վաճառվի և ընդգրկվի Caixabank–ի կառուցվածքի մեջ, իսկ մյուս երեք ազգայնացված բանկերը մոտակա 5 տարիների ընթացքում պետք է հաշվեկշիռներն ավելի քան 60 %-ով կրճատեն։ Դրա համար, մասնավորապես, բանկերը ստիպված կլինեն կրճատել մասնաճյուղերը, որը կհանգեցնի հաստիքների զանգվածային կրճատումների։
Տվյալ պահին Իսպանիայի գործազրկության մակարդակն ամենաբարձրն է եվրոգոտում։ 2012 թ երրորդ եռամսյակի տվյալներով՝ այն Իսպանիայում հասել է 25 %-ի, իսկ երիտասարդների շրջանում (25 տարեկանից ցածր)՝ 52 %–ի։
ԵՀ-ի որոշումը կարող է շրջադարձային լինել իսպանական բանկային ճգնաժամի զարգացման համար, որն անկման ենթարկեց երկրի տնտեսությունը, երբ անշարժ գույքի շուկայի «փուչիկը պայթեց»։ Մյուս իսպանական վարկատու բանկերի ֆինանսական օգնության ծավալը ԵՀ-ի կողմից կորոշվի մինչև 2012 թ. դեկտեմբերի 20-ը։
Հիշեցնենք, որ Իսպանիայի ՀՆԱ-ն շարունակում է պակասել։ Իսպանիայի տնտեսությունը չորրորդն է եվրոգոտում, որը 2012-ի երրորդ եռամսյակում «սեղմվել» է 0,3 %-ով՝ նույն տարվա երկրորդ եռամսյակի համեմատ։ Տերեկան կտրվածքով Իսպանիայի ՀՆԱ-ն կրճատվել է 1,6 %- ով։
Երկրի տնտեսությունը լուրջ կորուստներ կրեց անշարժ գույքի շուկայի ձախողումից։ Տնտեսական անկման պատճառ հանդիսացավ նաև սպառողների սպառման մակարդակի իջեցումը։ Բանկերը հրաժարվեցին նրանց վարկային միջոցներ տրամադրել՝ զգուշանալով, որ գործազրկության բարձր մակարդակի պատճառով վարկառուները չեն կարողանալու փակել դրանք։
