Երևանի Մալաթիայի գյուղմթերքի շուկայում հուսահատված գյուղացիները «Առաջին լրատվական»-ի հետ զրույցում նշեցին, որ վարկերը չեն կարողանում մարել, իսկ բանկերն էլ ոչ մի պատճառաբանություն չեն ընդունում՝ այն պարագայում, երբ գյուղացիների բերքի մեծ մասը կարկուտի հետևանքով ոչնչացել է, եղածն էլ վնասված է: Վարկերը փակելու միակ միջոցը պահպանաված քիչ բերքը վաճառելն է, բայց արտագաղթի պատճառով գնորդ չկա:
Գյուղացիները մեզ հետ զրույցում դժգոհեցին՝ ասելով, որ իրենք այլ ծախսեր էլ ունեն, պիտի կոմունալ թանկացած վճարումները կատարեն, ընտանիք պահեն: Նրանց խոսքով՝ հիմա հայտնվել են անմխիթար վիճակում, եթե այսպես շարունակվի, իրենք էլ կթողնեն երկրից կգնան: «Մենք էլ ենք փախնելու, սենց գնաց, հայթափվելու ա, էս ժողովրդի վիճակը վիճակ ա՞»,- տառացիորեն գոռում էին շուկայում՝ հավելելով, որ կառավարության հետ հույսեր չեն կապում, Հովիկ Աբրահամյանի խոստումներին էլ չեն հավատում:
«Այ խողերը կառավարության գլխին, կառավարություն կա հիմի, ինչքան հարուստները ապրում են, էլի քյասիբները նույնն են, վրեններս տոկոսները դրած՝ ճռցնում են, դե գնա փակի…»,- բարկացած ասացին շուկայում՝ չցանկանալով անգամ կառավարության, վարչապետի անունը լսել: «Եթե կառավարությունը իր գործը լավ կատարեր, այսպիսի վիճակ չէր ստեղծվի և բանկերը գյուղացիների հետ այսպես չէին վարվի»,- համոզված են նրանք:
