«Ժառանգություն» կուսակցության նախագահ Րաֆֆի Հովհաննիսյանը լրագրողների հետ հանդիպմանն անդրադառնալով առաջիկա նախագահական ընտրություններին` նշեց. «Ես փորձել եմ ինձ և «Ժառանգությանը» հեռու պահել ստորգետնյա, ինտրիգային խորհրդակցություններից և պայմանավորվածություններից: Մենք հայտարարել ենք, թե ինչպիսի Հայաստան ենք պատկերացնում: Մենք ոչ թե վերամբարձ, այլ հստակ օրակարգային ծրագիր ենք ներկայացնում»:
Նա նշեց, որ ընդդիմադիր քաղաքական ուժը ուզում է հավաքական թեկնածության մաս կազմել: Ըստ նրա` ով ուզում է դե յուրե իշխանություն և դե յուրե պետություն ունենալ, որը հետապնդելու է ազգային շահ, միայն նա կարող է դա իրականացնել` հասարակական հավաքական թեկնածության միջոցով, և ինքը պատրաստ է լինել այդ միասնական թեկնածության մասնիկը:
Այստեղ, նրա խոսքով, միասնական կախարդական թեկնածուի հարցը չէ, բայց եթե տեսնեն՝ քաղաքական կուսակցությունների, քաղաքացիական հասարակության, երիտասարդության միջոցով իսկապես կարելի է դուրս գալ այս ճակատագրապաշտությունից և ինչ-որ բան փոխել, ինքը պատրաստ է պնդել սեփական թեկնածությունը` հավաքական թեկնածության շրջանակներում, կամ էլ հակառակը, բայց պետք է լինի հավաքական:
