Մեծ Բրիտանիան չի ձգտի ամեն գնով համաձայնագիր կնքել Իրանի հետ՝ այդ երկրի միջուկային ծրագրի վերաբերյալ, քանի որ գործարքը, որը չի ներկայացնում բավարար երաշխիքներ, չի բխում Լոնդոնի և ողջ միջազգային հանրության շահերից: Այս մասին հայտարարել է Մեծ Բրիտանիայի արտգործնախարար Ուիլյամ Հեյգը ավստրիական Wiener Zeitung պարբերականին տված հարցազրույցում:
«Մենք ոչ մի դեպքում չենք ընդունի ցանկացած գնով ձեռք բերված համաձայնագիրը, քանի որ համաձայնագիրը, որը չի պարունակում բավարար երաշխիքներ, չի բխում ո՛չ Մեծ Բրիտանիայի, ո՛չ տարածաշրջանի, ո՛չ էլ միջազգային հանրության շահերից»,- ասել է Հեյգը:
Թղթակցի դիտարկմանը, թե դա զգալի ջանքեր է պահանջում, Հեյգը նշել է, որ կողմերը դեռևս շատ հեռու են այն իրավիճակից, որ կարելի լինի խոսել համաձայնագրի երաշխավորված ձեռք բերման մասին:
Իրանի և «վեցյակի» միջև մնում են տարաձայնություններ առանցքային հարցերի շուրջ՝ հավելել է Հեյգը: Նա նշել է, որ այդ տարաձայնությունները պետք է հաղթահարվեն՝ հավելելով, որ ընթացիկ բանակցությունները տրամադրում են խնդրի լուծման վերջին մի քանի տարիների լավագույն պայմանները:
Հուլիսի 2-ից սկսած՝ Վիեննայում անցկացվում է Իրանի և միջազգային միջնորդների «վեցյակի» միջև բանակցությունների 6-րդ ռաունդը, որի արդյունքում նախատեսվում է մինչև հուլիսի 20-ը մշակել պայմանավորվածություն իրանական միջուկային ծրագրի բացառապես խաղաղ բնույթի երաշխիքների մասին՝ Իրանի վրայից միջազգային պատժամիջոցների աստիճանական լիարժեք հանման դիմաց: