Երևանի մամուլի ակումբը հրապարակել է հեռուստաեթերի մոնիտորինգի տվյալներ, ըստ որոնց` եթերում խտրականություն չի դրվել նախագահի հնարավոր թեկնածուների և կուսակցությունների միջև: ԵՄԱ նախագահ Բորիս Նավասարդյանն «Արմնյուզ» հեռուստաընկերության «Բանաձև» հաղորդման եթերում ասել է, որ նախապես որոշվել էր տասը օրը մեկ թարմացնել արդյունքները, բայց քանի որ անորոշ է քաղաքական ներկապնակը, անհնար է ամբողջությամբ ներկայացնել՝ ինչ է կատարվում: Մասնավորապես, ԲՀԿ-ից է կախված մյուս կուսակցությունների վարքագիծը, և այսօր որևէ թեկնածուի հաստատ առաջադրման մասին խոսել հնարավոր չէ: Ներքաղաքական ներկա իրավիճակը Բորիս Նավասարդյանը բնորոշել է որպես «ակտիվ անորոշության շրջան»:
«Լուսաբանումը և ցուցադրումը հավասար չի կարող լինել: 33 մարդու անուն է տրվում՝ որպես նախագահի թեկնածուի, և պարզ է, որ հավասարաչափ չի կարող լինել ցուցադրումը: Նախագահական ընտրությունների բուն քարոզարշավի և մյուս ընտրությունների ժամանակ օգտագործում ենք այլ ձևակերպում` խտրականություն չի դրվում կուսակցությունների կամ թեկնածուների միջև: Այսինքն, եթե թեկնածուներն ասելիք ունեն, կարողանում են հայտնել»,- ասել է Բ. Նավասարդյանը` հավելելով, որ վերջնական գնահատական կտա, երբ պարզ լինի, թե ում միջև է ընթանում պայքարը, և արդյո՞ք նախագահին ձեռնոց նետած անձը լիարժեքորեն լուսաբանվում է:
Բորիս Նավասարդյանի խոսքերով՝ այժմ, ավելի քան երբևէ, հանրությանը հուզող թեմաներին անդրադարձ չի կատարվում եթերում. «Այո, կարևոր թեմա է` կառաջադրվի՞ Գագիկ Ծառուկյանը, թե՞ ոչ, կսատարի՞ Լևոն Տեր-Պետրոսյանը նրան, թե՞ ինքը կառաջադրվի: Սակայն չկա թեման, թե ինչու պետք է ընտրողը ձայն տա նրանց: Չեն խորանում թեկնածուների ծրագրերի մեջ»: Հեռուստաեթեր էլ, ըստ Նավասարդյանի, չեն բերում այնպիսի մարդկանց, որոնք անդրադառնան կոնկրետ խնդիրների: Հեռուստադիտողը սովոր է լեզվակռվի, սակայն բովանդակային վեճ չկա:
ԵՄԱ նախագահը բոլոր թեկնածուների համար անհրաժեշտ է համարում բանավեճը: Այս ընտրություններում չի կարող կառավարման խորհրդարանական համակարգը քաղաքական կարևոր թեմա լինել, և բանախոսը տարօրինակ է համարում այդ առիթով կոնսուլտացիաները:
Քաղաքական տեղեկատվության փոխանցման առումով, ըստ Բորիս Նավասարդյանի, հեռուստատեսությունը կորցրել է մենաշնորհը, և այսօր առցանց լրատվամիջոցները լուրջ հակառակորդներ են: Հեռուստատեսությունն էլ հույսը դրել է զվարճալի հաղորդումների վրա, որով չի կարող համացանցը հասնել հեռուստատեսությանը:
