Եվրոպայի ժողովրդական կուսակցության արտաքին հարաբերությունների գծով քարտուղար Նիկոլյա Բրիեկը, անդրադառնալով հայաստանյան քաղաքական կուսակցությունների ինտեգրմանը ԵՄ քաղաքական ընտանիքին, նշեց, որ վերջին շրջանում Հայաստանից մեծ թվով հայտեր են ստացել:
«Հայաստանը այն երկրների շարքում է, որոնք ուզում են մտնել համընդհանուր եվրոպական ընտանիքի մեջ: Հայաստանը չի ուշացել գնացքից, և այդ ինտեգրումը առաջիկա տարիներին տեսանելի արդյունքներ կարձանագրի»,- նշեց Բրիեկը:
Բրիեկը տեղեկացրեց, որ ԵՄ քաղաքական ընտանիքի մաս կազմող ամենամեծ կուսակցություններն են Եվրոպայի ժողովրդական կուսակցությունը(EPP), Եվրոպայի սոցիալիստական կուսակցությունը(PES), Եվրոպայի լիբերալ-դեմոկրատական կուսակցությունը(ALDEP), Կանաչների կուսակցությունը(Green P), Պահպանողականների և ռեֆորմիստների կուսակցությունը(GR P) և Եվրոպական ձախերի կուսակցությունը(PRL), որոնք էլ հայաստանյան կուսակցություններին հնարավորություն են ընձեռում ինտեգրվելու եվրոպական քաղաքական ընտանիքին` պայմանով, որ կուսակցությունները կկատարեն մի շարք նախապայմաններ, որոնք հիմնականում կապված են ժողովրդավարության հետ:
Նիկոլյա Բրիեկի խոսքերով այդ նախապայմանները մշակվել են Եվրապառլամենտի կողմից և վերջինս դրանց համապատասխանող կուսակցություններին տրամադրում է սուբսիդիաներ:
Բրիեկի գնահատմամբ, ինտեգրվելով եվրոպական քաղաքական ընտանիքին, հայաստանյան կուսակցությունները կարող են համաեվրոպական շահեր հետապնդել:
