Վրաստանի խորհրդարանի նախկին նախագահ Նինո Բուրջանաձեն հայտարարել է Սաակաշվիլիի դեմ քննության հետ համագործակցելու պատրաստակամության մասին: Քննությունը տարբեր ուղղություններով անցկացնում է «Վրացական երազանքը», որը հաղթել է հոկտեմբերի 1-ին տեղի ունեցած խորհրդարանական ընտրություններում: Այս մասին հայտնում է «Վզգլյադը»:
«Ես անհանգստանալու ոչինչ չունեմ, իսկ ահա «Միացյալ ազգային շարժումը» պետք է նյարդայնանա»,-լրագրողներին ասել է Բուրջանաձեն:
«Պատրաստ եմ քննչական գործընթացին մասնակցել ցանկացած հարցով, օգնել առավելագույնս, համագործակցել առավելագույնս»,- ասել է նա:
«Իմ քաղաքական հակառակորդները ցանկանում են շատ բան թաքցնել»,- վստահեցրել է նա:
Ավելի վաղ Նինո Բուրջանաձեն հայտարարել էր, որ «պետք է ուսումնասիրվի Սաակաշվիլիի կուսակցության գոյության օրինականությունը»:
Նրա խոսքով՝ և´ Սաակաշվիլին, և´ երկրի մյուս բարձրաստիճան պաշտոնյաները, պետք է դատարանի առջև կանգնեն: «Շատ պետք է աշխատել երկիրը լավ մաքրելու նրանցից, ովքեր քրեական հանցագործություն են կատարել»,- ասել է Բուրջանաձեն:
«Խորհրդարանի ընտրություններում դրական տեղաշարժ է տեղի ունեցել, սակայն նախագահը մնում է Սաակաշվիլին, որը չի ցանկանում հանձնել իշխանությունը»,- ընդգծել է նա:
Ավելի ուշ նրա կարծիքին է միացել հայտնի փաստաբան Շալվե Խաչապուրիձեն, որը հայտարարել է, որ մոտ ժամանակներս Սաակաշվիլիի կուսակցության արգելման հայցով կդիմի Սահմանադրական դատարան:
