Անցած տարի Հայաստանի սպառողներին մատակարարված ջրի 81.3 %-ը կորել է, իսկ սպառողներին հասել է միայն 18.7 %-ը: Հանրապետությունում ջրի կորուստներն առավել մեծ են Գեղարքունիքում՝ 88.5 %,և մյուս մարզերի համեմատ առավել քիչ Տավուշում՝ 76.2 %: Երևանում ջրի կորուստները կազմել են 81.3 %: Սա, բնականաբար, ջրային ցանցի անորակության, մաշվածության արդյունք է, որ շարունակվում է տարիներ ի վեր, թեև մեր երկրում խմելու ջրի մատակարարման, ջրահեռացման և կեղտաջրերի մաքրման ծառայություններ մատուցում են «Լոռի-ջրմուղկոյուղի», «Շիրակ-ջրմուղկոյուղի», «Նոր Ակունք», «Հայջրմուղկոյուղի» և «Երևան Ջուր» ընկերությունները:
Ազգային վիճակագրական ծառայության հրապարակած տվյալների համաձայն՝ 2012 թ. հունվարի 1-ի դրությամբ կենտրոնացված ջրամատակարարման համակարգում հաշվառված ջրմուղի մայր (մագիստրալային) ջրատարի, փողոցային, միջթաղային ու միջբակային ցանցերի միագիծ ընդհանուր երկարությունները կազմել են, համապատասխանաբար` 5648.1, 7708.3 և 1175.3 կմ, որից քաղաքային համայնքներում` 3899.3, 4501.8 և 957.8 կմ:
2011 թ. ցանցին բաց է թողնվել 516.3 մլն խ/մ ջուր (ք. Երևան` 319.1 մլն խ/մ), որից 370.6 մլն խ/մ-ը` ինքնահոսքով (ք. Երևան` 237.2 մլն. խ/մ): 2011 թ. ջրի կորուստը կազմել է ցանցին տրված ջրի ընդհանուր ծավալի 81.3 %-ը, Երևան քաղաքում` 81.3 %-ը:
2011 թ. սպառողներին տրվել է 96.3 մլն խ/մ ջուր, այդ թվում իր համակարգի սպառողներին` 94.6 մլն խ/մ, այլ սպառողներին` 1.7 մլն խ/մ ջուր: Իր համակարգի սպառողներին տրված ջրից բնակչությանը տրվել է 62.4 մլն խ/մ, կոմունալ-կենցաղային և արտադրական կարիքների համար` 32.2 մլն խ/մ ջուր:
