Իրանական ISNA լրատվական գործակալության փոխանցմամբ`Իրանի էներգետիկայի նախարարությունը մասնավոր սեկտորին թույլ է տվել կառուցել էլեկտրակայաններ ու արտահանել էլեկտրաէներգիա: Այս մասին հայտարարել է Իրանի էներգետիկայի նախարար Մաջիթ Նամժոուն:
Վերջինիս խոսքերով` մասնավոր սեկտորը կարող է այլ երկրներից գործընկերներ ներգրավել: Ավելի վաղ Նամժոուն հայտարարել էր, որ Իրանը սկսելու է մոտ ապագայում էլեկտրաէներգիա արտահանել Լիբանան: Իրանը պլանավորել է նաև 6000 մեգավատտ/ժամ էլեկտրաէներգիա արտահանել դեպի Հնդկաստան ու Պակիստան, որից 4000 մեգավատտ/ժամը բաժին է ընկնելու Հնդկաստանին, իսկ 2000 մեգավատտ/ժամը` Պակիստանին:
Ներկայումս Իրանը ձգտում է վերածվել տարածաշրջանի խոշորագույն էլեկտրաէներգիա արտահանողի և այդ պլանում 1.1 միլիարդ դոլար է ներդրել երեք էլեկտրակայանների կառուցման մեջ: Իրանի էներգետիկայի նախարարությունը պլանավորել է մինչև ընթացիկ տարեվերջ (ավարտվում է հաջորդ տարվա մարտի վերջին) էլեկտրաէներգիայի արտադրական հզորությունը հասցնել մինչև 70,000 մեգավատտի: Վերջին 10 տարիներին Իրանում էլեկտրաէներգիայի արտադրության պոտենցիալն աճել է 10 անգամ:
