Հանրապետության գլխավոր տոնածառի տեղադրման և զարդարման աշխատանքները սկսվելու են դեկտեմբերի 1-ից` «Հայկական ժամանակ»-ի թղթակցի հարցմանն ի պատասխան հայտնել են Երևանի քաղաքապետարանի տեղեկատվության և հասարակայնության հետ կապերի վարչությունից: Ի դեպ, ամանորյա լույսերը քաղաքում սկսել են տեղադրվել դեռ նախօրեից և, ըստ «ավանդույթի», ամենաբանուկ ժամերին, խցանումներ առաջացնելով ու նաև վթարների պատճառ դառնալով: Քաղաքապետարանից «ՀԺ» թղթակցին հայտնել են, որ տեղադրված լույսերը դեռ չեն վառվելու: Թե ինչպիսին կլինի Հանրապետության հրապարակում տեղադրվելիք գլխավոր տոնածառը, որոշել են գաղտնի պահել, որ անակնկալ մատուցեն:
Սակայն, եթե այս հարցում «խորհրդավորության քողը» դեռ հասկանալի է, ապա «ՀԺ» թղթակցի հղած մնացած հարցերի դեպքում Տարոն Մարգարյանի ղեկավարած կառույցի գաղտնապահությունը լուրջ կասկածների հիմք է տալիս: Մասնավորապես, քաղաքապետարանից հրաժարվել են հայտնել, թե որքան գումար է հատկացված` Նոր տարվան ընդառաջ քաղաքը զարդարելու համար: Չեն հայտնել նաև, թե դիզայներական որ ընկերություններն են մասնակցելու ձևավորման աշխատանքներին: «Ձևավորման աշխատանքներին մասնակցելու են տարբեր դիզայներական ընկերություններ, այդ թվում նաև Երևանի քաղաքապետարանի ենթակայությամբ աշխատող «Ձևավորում» ՓԲԸ-ն»,- ասված է հարցմանը տրված գրավոր պատասխանի մեջ: Բանավոր էլ պնդել են, թե գնումների գործընթաց է կազմակերպվելու, դրա համար էլ գումարի և ընտրված ընկերությունների մասին մանրամասներ չեն հաղորդում: Հավելենք նաև, որ ո´չ քաղաքապետարանի, ո´չ էլ գնումների գործակալության կայքում ամանորյա զարդարանքների վերաբերյալ հայտարարություն թերթը չգտավ:
