Նոյեմբերի 20-ին ոստիկանները, այդ թվում` կարմիր բերետավորները, շրջապատել էին «Արայ» ընկերության նախկին սեփականատեր, 2011թ. ինքնասպանություն գործած Արմեն Պետրոսյանի մոր` Կարինե Սուքիասյանի տունը: Ոստիկանները կատարում էին դատարանի` երեխային մորը հանձնելու որոշումը: Արմեն Պետրոսյանի նախկին կինը` ազգությամբ ռուս Տատյանա Չադենկովան, ամիսներ շարունակ դատական կարգով փորձում էր տատիկից վերցնել դստերը: Արմեն Պետրոսյանի մոր ու երեխայի անհետանալուց հետո Տ. Չադենկովան դիմել էր Ոստիկանություն, որի կապակցությամբ միջազգային հետախուզում էր հայտարարվել և գործ էր հարուցվել Քրեական օրենսգրքի 167 հոդվածի` ծնողներից երեխային ապօրինի բաժանելու հատկանիշով: Ամռանը Բագրատաշենի անցակետից Արմեն Պետրոսյանի մայրը թոռնուհու հետ բերման է ենթարկվել, այնուհետև ստորագրությամբ ազատ արձակվել:
Ըստ «168 ժամի» աղբյուրների` օրեր առաջ ոստիկանների հետ Ա. Պետրոսյանի մոր տուն է գնացել նաև մի հոգեբան, ով ընթացքում զրուցել է երեխայի հետ` ճշտելու նրա հոգեկան վիճակը: Հոգեբանն ասել է, որ երեխայի վիճակը նորմալ է, չնայած այն բանին, որ երեխան պատրաստ չի եղել տեղափոխության: 6-ամյա երեխան, ի դեպ, սովորում էր երևանյան դպրոցներից մեկում` առաջին դասարանում: Արդեն քանի օր է` երեխայի մայրը նրան, սակայն, դպրոց չի տանում: Տ. Չադենկովան ՀՀ-ից բացակայելու իրավունք չունի, սակայն հայտնի չէ, թե ինչո՞ւ է երեխային զրկել դպրոց հաճախելուց և ընկերների հետ շփվելուց: Պատմում են, որ տատիկի հետ զրույցում մայրն ասել է, թե մեկ տարի հետո դպրոց կտանի երեխային: Պատկերացնել կարելի է, թե մեկ տարի տևողությամբ այս դաժան դեպքերից, քաշքշուկներից հետո երեխան ինչպիսի հոգեկան ծանր ապրումներ կարող է ունենալ: Այն դեպքում, երբ դպրոցական, ընկերական միջավայրը կարող է երեխային օգնել` հաղթահարել իր ապրումները:
