Գալիք նախագահական ընտրություններին իշխամանամետ էլեկտորատի ձայները բաժանված են՝ առյուծի բաժինը հասնում է ՀՀԿ-ին, փոքր մասը՝ ՕԵԿ-ին, իսկ մյուս մասը՝ ԲՀԿ-ին: Սակայն ԲՀԿ ղեկավար Գագիկ Ծառուկյանը լուրջ մրցակից է ոչ թե իշխանական թևի համար, այլ՝ ընդդիմադիր: Այսօր լրագրողների հետ հանդիպման ժամանակ այս մասին ասաց «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանը՝ խոսելով գալիք նախագահական ընտրություններին հնարավոր թեկնածուների վարկանիշների և հնարավորությունների շուրջ:
Նա նշեց, որ եթե նախագահական պայքարի մեջ մտնեն Ծառուկյանն ու Սարգսյանը, նրանց հավաքած ձայների բաժինը կախված կլինի, թե երրորդ -չորրորդ լուրջ խաղացողներն ովքեր կլինեն և ինչ ձայներ կտանեն: Ըստ սոցիոլոգի՝ Ծառուկյանի սոցիալական բազան հնարավոր է՝ տանի Րաֆֆի Հովհաննիսյանը, ՀՅԴ-ն կարող է տանել՝ թեկնածու ունենալու դեպքում:
«Այլ ընդդիմադիր թեկնածուների առաջադրման դեպքում Ծառուկյանն առաջադրվելով՝ կունենա երեսուն տոկոս ձայն, որոնցից քսանը՝ իշխանամետ, տասը՝ ընդդիմադիր: Եթե տետ-ա-տետ մնան Սերժ Սարսյանն ու Գագիկ Ծառուկյանը, Սարգսյանի շանսերն ավելի մեծ են, քանի որ յոթ հարյուր համայնք վերահսկում են հանրապետականները, նրանք ունեն շտաբներ, որոնցից չորս հարյուրն աշխատում է անընդհատ, նրանք լուծում են տեղական հարցեր: Այնպես որ, խոսել, թե միայն ադմինիստրատիվ ռեսուրսով է գալիս իշխանության՝ կլինի չափազանց»,- մեկնաբանեց Ահարոն Ադիբեկյանը՝ հստակեցնելով, որ ԲՀԿ ձայներն այսօր 45 % են:
Անդրադառնալով գալիք նախագահական ընտրություններին մասնակցության վերաբերյալ ԲՀԿ դիրքորոշման ձգձգմանը՝ նա ասաց. «Եթե դու վստահ չես, որ կարող ես հասնել մեծամասնության, պետք է գտնես աջակից տարբեր ոլորտներում: Կարծում եմ՝ այս խմորումները, բանակցությունները դեռ ընթացքի մեջ են, կտեսնեն, թե բանակցություններն ինչ արդյունք են տալիս, դրա հիման վրա որոշում կկայացնեն»:
