Շատ ուրախ եմ, որ Երևանում եմ, ուրախ եմ, որ դարձյալ ելույթ եմ ունենալու Արամ Խաչատրյանի անվան համերգասրահում, որտեղ ելույթ եմ ունեցել, երբ դեռ այս սրահը չէր կրում Արամ Խաչատրյանի անունը: Ես նրա հետ ծանոթ էի դեռ Մոսկվայից ու բազմիցս հանդիպել եմ: Ինձ համար հուզիչ է հանդես գալ այս բեմում: Այս մասին լրագրողների հետ հանդիպմանը ասաց ԽՍՀՄ ժողովրդական արտիստ Իոսիֆ Կոբզոնը, ով խոստովանեց, որ Հայաստանի հետ իրեն շատ բան է կապում:
Կոբզոնը խոստովանեց, որ իր ստեղծագործական կյանքի ընթացքում համագործակցել է բազմաթիվ հայ կոմպոզիտորների՝ Ալեքսանդր Դոլուխանյանի, Միքայել Թարիվերդիևի, Ալեքսեյ Հեքիմյանի, Առնո Բաբաջանյանի, Գեորգի Մովսիսյանի հետ, որոնցից շատերի հետ ընկերական ջերմ հարաբերություններ է ունեցել ու վերջիններիս ստեղծագործություններից կկատարի իր այսօրվա երևանյան համերգի ընթացքում:
Խոսելով Սպիտակի երկրաշարժի մասին՝ երաժիշտը, ով նաև Սպիտակի պատվավոր քաղաքացի է, նշեց, որ տեսնելով «հայ ժողովրդի տանջանքները, մեծ սիրով համակվեց հայերի նկատմամբ»:
«Ես որպես ասիմիլացված հրեա, որը ծնվել է Ուկրաինայում, գիտեմ հրեա ժողովրդի պատմությունը ու հաճախ շատ ընդհանուր բաներ եմ գտնում այդ երկու երկրների տառապանքներում, աշխարհագրական դիրքում՝ մշտական կոնֆլիկտներ, աղետներ»,- ասաց երգիչը՝ ուրախությամբ նշելով, որ այսօրվա Սպիտակը տարբերվում է այն ավերված քաղաքից, որը տեսել է երկրաշարժից հետո:
Ինչպես տեղեկացրել էինք, «Արամ Խաչատրյան» համերգասրահում տեղի կունենա Կոբզոնի հոբելյանական բարեգործական համերգը, որի ժամանակ հանդես կգան նաև դաշնակահար Ալեքսանդր Եվտյուկովը, ՌԴ ժողովրդական արտիստ, գեներալ-մայոր Վիկտոր Ելիսեևը: Համերգի ողջ հասույթը կտրամադրվի Գյումրիի երաժշտական դպրոցներին: Համերգի աջակիցներն են` ՀՀ մշակույթի նախարարությունը, «Սոզվեզդիե» միջազգային բարեգործական հիմնադրամը, ԱՌՏԵՍ մշակութային հիմնադրամը:
