Օրեր առաջ ԱՄՆ-ի Լոս Անջելես քաղաքում մահացած ՀՀ ժողովրդական արտիստուհի, Կոմիտասի անվան միջազգային երաժշտական դպրոցի հիմնադիր, երգչուհի Ֆլորա Մարտիրոսյանի մահվան պատճառները շարունակում են չբացահայտված մնալ և տարատեսակ մեկնաբանությունների, բժիշկներին ուղղված քննադատությունների տեղիք տալ: Հայտնի է միայն, որ սիրված երգչուհին նոյեմբերի երկրորդ տասնօրյակի սկզբին լեղապարկի վիրահատության էր ենթարկվել: Նա ֆեյսբուքյան իր էջում հայտարարություն էր տարածել, որ վիրահատվելու է, և այդ պատճառով իր առաջիկա համերգը հետաձգվել է:
Ըստ որոշ տեղեկությունների՝ վաստակավոր երգչուհի Ֆլորա Մարտիրոսյանը մահացել է արյան վարակից:
«Առաջին լրատվական»-ը փորձեց պարզել, թե ինչ բարդություններ կարող էին առաջանալ լեղապարկի վիրահատությունից հետո, և մասնավորապես` արյան վարակում ո՞ր դեպքում է լինում:
Թիվ 1 համալսարանական կլինիկայի վիրաբույժ Հովհաննես Հովհաննիսյանը բացատրեց, որ որովայնի խոռոչում կատարվող վիրահատություններն իրենց բարդությամբ տարբեր աստիճանի են լինում: Իսկ լեղապարկի վիրահատությունը, բժշկի խոսքով, որովայնի խոռոչում կատարվող ամենաբարդ վիրահատություններից մեկն է: Հովհաննես Հովհաննիսյանը հստակեցրեց, որ հեշտ ու դժվար, պարզ ու բարդ վիրահատություններ չկան, այլ կա բժշկություն, որտեղ ամեն ինչ հնարավոր է:
«Կարող է վիրահատենք մեկին` նախապես մտածելով, որ դժվար վիրահատություն է լինելու, բայց հիվանդն այնպիսի անատոմիական կառուցվածք ունենա, որ կես ժամում հեշտ ու հանգիստ ավարտենք վիրահատությունը: Կարող է նաև հակառակը լինել: Այսինքն՝ գրքով նկարած դեպքեր չեն, որ վիրահատարաններում հանդիպում են, այլ հազար ու մի բարդություն է հանդիպում՝ նորմալ անատոմիական շեղումներ, որոնք վիրահատության ընթացքում առաջացնում են բարդություններ կամ երկարաձգում են վիրահատությունը»,- նշեց վիրաբույժը:
Նա նշեց, որ մարմնի ավելորդ քաշ, ճարպակալում ունեցող մարդկանց դեպքում տեխնիկապես ավելի դժվար է անցնում վիրահատությունը, և հետվիրահատական բարդությունների առաջացման հավանականությունը փոքր-ինչ մեծանում է:
Անդրադառնալով Ֆլորա Մարտիրոսյանի մահվան մի քանի հանգամանքներին՝ բժիշկը դժվարացավ ասել, թե ԱՄՆ-ում ինչ վիրահատություն են կատարել և ինչ բարդություն է առաջացել, որովհետև այդ մասին ոչ ոք ոչինչ դեռ չի ասել: Իսկ ինչ վերաբերում է արյան վարակմանը, ապա, նրա խոսքով, «արյան վարակում» ասվածը հարաբերական է: Ըստ նրա՝ դա կախված է նրանից, թե ինչ խոլեցիստիտ՝ լեղապարկի բորբոքում է եղել, թե հետվիրահատական ինչ բարդություններ են զարգացել` պայմանավորված տվյալ օրգանիզմի առանձնահատկություններով:
«Արյան վարակում ասվածն ընդհանուր օրգանիզմի ինֆեկցիա է, որը ժողովրդի լեզվով է այդպես ՝ արյան վարակում: Կախված նրանից, թե ինչ աստիճանի բորբոքային պրոցես է զարգանում, օրգանիզմում արյան մեջ տեղի են ունենում փոփոխություններ, որը ժողովուրդն ասում է` արյան վարակում: Իրականում այն ինֆեկցիան, որը կա ընդհանուր օրգանիզմում, կարող է նաև թափանցել արյան մեջ: Լեղապարկի վիրահատության անհրաժեշտությունն առաջանում է այն ժամանակ, երբ լեղապարկում կան քարեր, որոնք շարժվելով` լեղապարկի պատի, շրջակա հյուսվածքների բորբոքումներ են առաջացնում:
Ուստի այս դեպքում անհապաղ քայլեր չձեռնարկելու պարագայում բորբոքումներն անցնում են շրջակա հյուսվածքներ՝ ենթաստամոքսային գեղձ, տասներկումատնյա աղիք, ստամոքս, լյարդ, ու սկսում տարածվել ամբողջ օրգանիզմով: Գուցե Ֆլորա Մարտիրոսյանի վիրահատությունը ուշացած է եղել, որն օրգանիզմում անդառնալի փոփոխությունների է բերել»,- մանրամասնեց վիրաբույժ Հովհաննես Հովհաննիսյանը:
Նա նաև ասաց` քանի դեռ չգիտենք, թե ինչ է իրականում եղել, ինչի պատճառով է սիրված երգչուհին դիմել վիրահատության, և հետվիրահատական ինչ բարդություններ են առաջացել, ոչ ոք իրավունք չունի բժշկին մեղադրելու:
Նշենք, որ մինչև երգչուհու մահվան հանգամանքները ուսումնասիրող քննիչների կողմից վերջնական եզրահանգումը չլինի, սիրված երգչուհու հոգեհանգստյան արարողությունը, որը նախատեսված է Լոս Անջելեսում, տեղի չի ունենա: Իսկ դեռևս չհաստատված տեղեկություններով՝ Ֆլորա Մարտիրոսյանի ազգականները պատրաստվում են դատական գործ սկսել ընդդեմ հիվանդանոցի, որտեղ վիրահատվել է երգչուհին:
