Ria Novosti-ի փոխանցմամբ՝ Թուրքիան երեկ պաշտոնապես դիմել է ՆԱՏՕ-ին՝ Patriot զենիթա-հրթիռային համալիրներ հատկացնելու խնդրանքով: ՆԱՏՕ-ի գլխավոր քարտուղար Անդերս Ֆոգ Ռասմուսենն այդ կապակցությամբ հայտարարել է, որ իրենք անհապաղ դիտարկելու են Անկարայի հայտը:
Թուրքական ԶԼՄ-ները հայտնում են, որ Patriot համակարգերը տեղակայվելու են թուրք-սիրիական 900 կիլոմետրանոց սահմանին: Այդ համակարգերը Թուրքիայում կարող են հայտնվել 15 օրվա ընթացքում: Թուրքիայի պաշտպանության նախարար Իսմեթ Յըլմազը լրագրողների հետ զրույցում հայտարարել է, որ ՆԱՏՕ-ն է որոշելու Թուրքային հատկացվելիք Patriot համակարգերի քանակը:
Թուրքական «Ջումհուրիյեթ» թերթը, վկայակոչելով իր «հուսալի աղբյուրներին», հայտնում է, որ Թուրքիան ներկայումս բանակցում է Գերմանիայի հետ Patriot (PAC-3)-ի 4 մարտկոցի հատկացման շուրջ, որոնք տեղակայվելու են Սիրիային սահմանակից Շանլըուրֆա (Ուրֆա) նահանգում:
Այդ համակարգերի սպասարկման համար Թուրքիա պետք է ժամանեն նաև մոտ 160 գերմանացի զինվորականներ: «Ջումհուրիյեթ» թերթի տվյալներով, Patriot (PAC-3) համակարգերը Թուրքիա են բերվելու ծովային ճանապարհով՝ Իսքենդերուն (Ալեքսանդրետ) նավահանգիստ, որտեղից էլ դրանք կուղարկվեն տեղակայման վայր:
Թուրքական «Աքշամ» թերթն իր հերթին գրում է, որ Patriot (PAC-3) համակարգերը պլանավորված է տեղակայել Հաթայ կամ Քիլիս սահմանային նահանգներում, և որ խոսքը գնում է 8 հրթիռային համալիրների մասին: Patriot (PAC-3) համակարգերն ավելի վաղ՝ 1991 և 2003 թվականների իրաքյան առաջին և երկրորդ պատերազմների ժամանակ, տեղակայվել են թուրքական տարածքում, սակայն չեն գործածվել ըստ իրենց նշանակության:
