Ստեղծված իրավիճակում Գագիկ Ծառուկյանի առաջադրումը հրամայական է. այսօր լրագրողների հետ հանդիպման ժամանակ այս մասին ասաց քաղաքական գործիչ, Ղարաբաղ կոմիտեի անդամ Աշոտ Մանուչարյանը՝ խոսելով «Նախընտրական իրարանցումը քաղաքական դաշտում» թեմայով:
Ըստ բանախոսի՝ Հայաստանն ապրում է իր պատմության ամենաճգնաժամային պահերից մեկը: Նրա համոզմամբ՝ վերջերս հսկայական դարձավ ՌԴ-ի դերը կառավարման խորհրդարանական համակարգին անցնելու մասին առաջարկություններից հետո: Ըստ նրա՝ այսպես հստակեցվեց ՌԴ-ի դերը հայաստանյան քաղաքական կյանքում, իսկ առանց Հայաստանում քաղաքական պարտնյորի հնարավոր չէ: Բանախոսի գնահատմամբ՝ երկրորդական, երրորդական ուժ այդ պարտնյորը չէր կարող լինել:
«Այս իրավիճակում շատ կարևոր է ՌԴ-ին տալ բալանսավորված խաղի հնարավորություն: Խիստ դրական է, որ ՌԴ-ն քաղպարտնյոր է ունենալու Հայաստանում: Այն քաղաքական ուժերի շրջանակը, որը ձևավորվելու կառավարման խորհրդարանական համակարգի անցնելու առաջարկի քննարկումների արդյունքում, լուրջ ուժ ստեղծելու հնարավորություն է տալու, որը հավասար կլինի հակադիր քաղաքական ուժին, որի պաշտպանությամբ հանդես են գալիս արևմտյան ուժերը: Այս դեպքում ՌԴ-ն հարկադրված չէ այլ գործիքներ փնտրել:
Միանձնյա լիդերի կարգավիճակում ոչ մի կուսակցության չպետք է թողնել, ցանկացած բալանսավորվածություն սահմանափակում է այս հնարավորությունը, բայց այս հավասարակշռությունը պարունակում է լուրջ վտանգ, սրա մեջ կա ներքին ցնցումների վտանգ»,- մեկնաբանեց բանախոսը: Ուստի Աշոտ Մանուչարյանի կարծիքով՝ Գագիկ Ծառուկյանի առաջադրումը հրամայական է դառնում:
