Կոսովոյի վարչապետ Խաշիմ Տաչիին մեղադրում են այն բանում, որ նա տարբեր երկրներից, մասնավորապես՝ Ռուսաստանից, Ուկրաինայից և Չինաստանից բերված կանանցից կազմված հարեմ և ստրուկներ ունի: Նման մեղադրանքներով հանդես է եկել մի ուկրաինուհի, ով իր խոսքերով՝ տարածքը հսկող չեչենի օգնությամբ փախել է հարեմից:
Ըստ MINA մակեդոնական տեղեկատվական գործակալության տեղեկությունների՝ ուկրաինուհին ասել է, որ 52 ստրուկ սպասարկում են ոչ միայն վարչապետին, այլև այլ քաղաքական գործիչների և գործարարների:
Հարեմը գտնվում է Shaip Spahija և Bedri Shala փողոցների խաչմերուկում` մեծ տան նկուղում, որը հատուկ այդ նպատակների համար է: «Աղջիկներից ոչ ոք Կոսովոյից չէր, մի քանի աղջիկներ Բալկանյան մի քանի երկրներից էին, մոտ 10-ը` Ռուսաստանից, մեկը՝ Կամերունից և երկուսը` Չինաստանից»,- պատմել է ուկրաինուհին, ով ցանկացել է, որպեսզի իրեն անվանեն Ն.Մ.:
Նա հաղորդել է, որ շենքում մի քանի VIP-սենյակներ կան, որտեղ Տաչին և իր ընկերները գինարբուքներ են կազմակերպում: «Այստեղ ժամանողների մեծ մասը տարիքով մարդիկ էին, քչերն էին երիտասարդ: Նրանցից շատերը միջազգային դիվանագետներ էին, այդ թվում՝ EULEX և KFOR առաքելության սպաներ»,- պատմել է Ն. Մ.–ն, ապա հավելել. «Աղջիկներին չէր թույլատրվում «ոչ» ասել: Աղջիկներից մեկը, ում անունը Դոլորես էր, և ով Կոլումբիայից էր, բողոքել էր պայմաններից, ինչի պատճառով Տաչիի թիկնապահը նրան գնդակահարեց»։
Ուկրաինուհին նաև պատմել է, որ Տաչիի հետ մեկ անգամ է եղել, երբ վերջինս հարեմ էր եկել թմրանյութի ազդեցության տակ:
