«Ընդունելության քննությունների առաջին փուլից լուրջ դժգոհություններ չկան»,- լրագրողների հետ զրույցում նշեց ԿԳ նախարար Արմեն Աշոտյանը՝ հավելելով, որ առջևում (հուլիսի 2-ից 8-ը) լրացուցիչ փուլն է: Այդ փուլին կմասնակցեն այն դիմորդները, որոնք հնարավորություն չեն ունեցել մասնակցելու առաջին փուլին՝ բանակից զորացրված երիտասարդները, Ջավախքի ու Սփյուռքի դիմորդները, ինչպես նաև առողջական խնդիրների պատճառով քննություններին մասնակցելու հնարավորություն չունեցած դիմորդները:
Արմեն Աշոտյանը նաև ընդգծեց, որ քննությունների ընթացքում կանխվել են տեխնիկական սարքերի օգտագործման բազմաթիվ փորձեր, որոնց միջոցով դիմորդները փորձել են պատասխանել քննության հարցերին. այդ դիմորդները հեռացվել են քննասենյակներից:
Ըստ Աշոտյանի՝ այդ դիմորդները ամեն կերպ փորձում են մասնակցել քննությունների երկրորդ փուլին, այդ թվում՝ դիմելով բողոքարկումների խնդրանքներով:
«Նախարարության տեսակետը այստեղ շատ խիստ է ու արդար. մենք թույլ չենք տալու նման դիմորդներին նորից մասնակցել քննություններին, որովհետև հասարակությանը, նախարարությանը, ԳԹԿ-ին խաբելու ցանկությունը չի կարող արդարացված լինել և թող դաս լինի մյուսների համար. ովքեր կցանկանան քննությունը հանձնել ոչ իրենց գիտելիքով, բնականաբար, կզրկվեն ընդունվելու հնարավորությունից»,- մանրամասնեց նախարարը:
Սակայն Ա. Աշոտյանը չցանկացավ բացահայտել այն մեթոդները, որոնց դիմել են դիմորդները, որպեսզի գովազդ չլինի: «Ինչպես հին ֆիլմում է ասվում՝ հնարի համար՝ 5, գիտելիքի համար՝ 2»,- եզրափակեց նախարարը:
Արմեն Աշոտյանը անդրադարձավ նաև մասնավոր բուհերի ընդունելության ցուցանիշներին՝ նշելով, որ այստեղ քիչ դիմորդներ են դիմել, ուստի մասնավոր բուհերը պետք է աշխատեն կրթության որակի վրա: