Грузия Online-ի փոխանցմամբ՝ երեկ Բրյուսելում տեղի է ունեցել ՆԱՏՕ-Վրաստան հանձնաժողովի նիստը, որում դիտարկվել են Վրաստանի նոր կառավարության առաջնահերթությունները: Նիստին մասնակցել են Վրաստանի պաշտպանության նախարար Իրակլի Ալասանիան, եվրաինտեգրման հարցերով պետնախարար Ալեքսի Պետրիաշվիլին, ինչպես նաև ՆԱՏՕ-ի գլխավոր քարտուղար Անդերս Ֆոգ Ռասմուսենը:
Ռասմուսենը հոկտեմբերի 1-ին Վրաստանում անցկացված խորհրդարանական ընտրությունները որակել է որպես ազատ ու արդար: Նա ընդգծել է, որ Վրաստանը կարևոր թեստ է հանձնել, և հաջորդ տարի կայանալիք նախագահական ընտրությունները լինելու են հաջորդ կարևոր թեստը:
Ռասմուսենը վրացական կողմին շնորհակալություն է հայտնել Աֆղանստանում տարվող խաղաղապահ առաքելությանը մասնակցելու համար և ողջունել է Վրաստանի եվրաատլանտյան ինտեգրման մղումը: Նշվում է, որ ՆԱՏՕ-Վրաստան հանձնաժողովի երեկվա այդ հանդիպումն առաջինն էր՝ Վրաստանում անցկացված խորհրդարանական ընտրություններից ու իշխանափոխությունից հետո:
