Արդար դատաքննություն անցկացնելու համար դատավորի աշխատավարձն, իհարկե, կարևոր գործոն չէ: Նման տեսակետ հայտնեց ԳԴՀ Համբուրգի երկրամասային դատարանի նախագահող դատավոր Մարկուս Շնայդերը՝ պատասխանելով «Առաջին լրատվական»-ի այն հարցին, թե արդար դատելու համար որքանով է կարևոր դատավորի աշխատավարձի չափը, քանի որ ՀՀ-ում դատավորների աշխատավարձերը բարձրացվեցին, սակայն արդարադատություն այդպես էլ չկա:
Ըստ Շնայդերի՝ Գերմանիայում դատավորները լավ են վարձատրվում, բայց՝ ոչ շատ բարձր. եթե համեմատենք ազատ գործող փաստաբանների հետ, ապա դատավորների աշխատավարձն անհամեմատ ցածր է:
«Ինչպես դատավորը, այնպես էլ ոստիկանը. եթե նրանց աշխատավարձը ցածր է, կոռուպցիայի վատնգ կա, մինչդեռ բարձր աշխատավարձի դեպքում կոռուպցիան ավելի քիչ է: Եթե ոստիկանությունն էլ ցածր վճարվի, ոչ մի երաշխիք չկա անբասիրության»,- ասաց գերմանացի դատավորը:
Հետզհետե Մարդու իրավունքների եվրոպական դատարանում շատանում է գործերի քննությունը, որոնցով վճիռներն ընդդեմ Հայաստանի Հանրապետության է լինում, արդյունքում ավելանում են պետբյուջեից վճարումները ՀՀ քաղաքացիներին, փոխարենը ոչ մի դատավոր ոչ մի պատասխանատվություն չի կրում այն գործերով վճիռների համար, որոնցով ՀՀ-ն պարտվում է ՄԻԵԴ-ում։
Այս ամենը ներկայացնելով՝ Շնայդերին հարցրեցինք, թե Գերմանիայում դատավորները պատասխանատվություն կրո՞ւմ են այն գործերի համար, որոնցով ՄԻԵԴ-ում պարտվում է պետությունը, ինչին նա պատասխանեց. «Դատավորին պատժելու համար պետք է լինեն օրենքի խախտման դեպքեր, օրենքի պահանջները շատ բարձր են, և միայն այդ դեպքում կարելի է դատավորին պատժել: ՄԻԵԴ-ի որոշումները յուրաքանչյուրն առանձին երկրներում պետք է կիրառվեն: Միայն այն հանգամանքը որ որոշումը սխալ է, դեռևս չի նշանակում օրենքի խախտում: Ուրիշ բան, որ ապացուցվի, որ այդ որոշումը կայացվել է օրենքի դիտավորյալ խախտմամբ, բայց դա որոշում է դատախազությունը, և եթե նման դեպք կա, քրեական դատարանը քննում է»:
