Վերջերս Ճարտարապետության և շինարարության Հայաստանի ազգային համալսարանի կոլեկտիվը բաց նամակ էր հղել Արմեն Աշոտյանին, որում նշված էր. «Պարո՛ն Աշոտյան, զսպե՛ք ձեր ախորժակը, կասեցրեք ճարտարագիտական կրթության վերջնական քայքայմանը հանգեցնող Ձեր գիշատիչ քայլերը. Ճարտարապետության և շինարարության Հայաստանի ազգային համալսարանը դեմ է Պոլիտեխնիկի հետ միավորմանը»:
Նշենք նաև, որ բուհի խոշորացման հետ կապված խնդիրների կապակցությամբ պարբերաբար դժգոհում են նաև պոլիտեխնիկի մի շարք դասախոսներ, ուսանողներ: Նրանք ևս նախարարին հորդորւմ էին հանգիստ թողնել բուհը:
«Առաջին լրատվական»-ը Արմեն Աշոտյանից հետաքրքրվեց բուհերի խոշորացման գործընթացից և Պոլիտեխնիկում «թեժացող կրքերից»: «Ես հետևել եմ ձեր լրատվական միջոցի նյութերին, կարծում եմ, որ բացի ձեր կայքից՝ որևէ մեկը չի նկատել, որ Պոլիտեխնիկում կրքեր են բորբոքված»,- պատասխանեց նախարարը : «Առաջին լրատվական»-ը նախարարին հիշեցրեց՝ բաց նամակ կա: «Իրականում կա անհանգստություն: Ես ձեզ հետ համաձայն եմ, անհանգստությունը բնական է: Ընդհանուր ճարտարագիտական գործընթաց ապահովելու պրոցեսը դեռևս նախագծվում է: Մենք երբևէ ինքնապատակ քայլ չենք արել, բուհերի խոշորացման հրամայականը կա»,- ասաց նախարարը: Ըստ նրա ՝ գործընթացը աներկբա է, անկախ նրանից՝ ով որ բուհի ռեկտորն է, որ ամբիոնի վարիչը: «Բուհերը ստեղծված չեն այդ մարդկանց համար, ինչպես նախարարությունը՝ նախարարի համար: Այդ պաշտոնյաների իմաստը համակարգի սպասարկումն է, ոչ թե իրենց՝ սեփական գոյությունը այդ պաշտոնում»,- ասաց Ա. Աշոտյանը՝ հավելելով, որ մշակում են առաջարկությունների փաթեթ, որը ենթադրում է բովանդակային մերձեցում ընդհանուր ենթակառուցվածքների, կրթական ծրագրերի մասով: Քննարկվում է նաև հետագայում Պոլիտեխնիկին հիմնադրամի կարգավիճակ շնորհելու հարցը:
«Առաջին լրատվական»-ը նախարարից հետաքրքրվեց՝ իսկ ինչ է լինելու այն դասախոսների հետ, որոնք գործընթացի հետևանքով դուրս են մնալու բուհերից: Ի պատասխան՝ ԿԳ նախարարը հորդերեց այս հարցով դիմել բուհի ռեկտորին: