«Բալասանյանն ո՞վ է, ո՞վ է դրան ճանաչում, որ մի հատ էլ հրավերք լիներ նրան: Ո՞վ է ինքը քաղաքի համար, որ մի հատ էլ գար խաչերի օծման արարողությանը, նրան ո՞վ է ճանաչում»,- «Առաջին լրատվական»-ի հետ զրույցում ասաց Գյումրիի նախկին քաղաքապետ Վարդան Ղուկասյանը՝ արձագանքելով հարցին, թե ինչու հրավեր չէին ուղարկել քաղաքապետ Սամվել Բալասանյանին՝ մասնակցելու Սուրբ Ամենափրկիչ եկեղեցու խաչերի տեղադրման և օծման արարողությանը:
Միևնույն ժամանակ նշենք, որ այդ օրը Բալասանյանը Հայաստանում չէր, մեկնել էր Վրաստան: Թերևս հատուկ, որպեսզի ներկա չլինի միջոցառմանը: Ղուկասյանից հարցրինք՝ արդյոք դա արհամարհանք չի՞ համարում իր և իր կազմակերպած միջոցառման նկատմամբ: «Օ՜, դե, ինքը շատ կարևոր տեղեր է գնում, երկնքից արեգակ է իջեցնում: Ինչ վերաբերում է արհամարհել կամ ինչ, ես բան չունեմ ասելու: Տո, դրա մասին ո՛չ ուզում եմ լսեմ, ոչ էլ: Ամբողջ քաղաքը գիտի՝ ինքն ով է»:
Նշենք նաև, որ նախապես հայտարարվածի համաձայն՝ միջոցառմանը պետք է մասնակցեր նաև Ամենայն Հայոց կաթողիկոս Գարեգին Բ-ն, որը ևս, ինչպես պարզ դարձավ, ներկա չէր: «Դե, հիմա կաթողիկոսը էդպես էր նախատեսել, հիմա ի՞նչ անենք: Վերջում, որ ամբողջությամբ վերջացնենք, կաթողիկոսը կմասնակցի: Աստծո ողորմածությամբ դիմացի տարին որ վերջացնենք, հերոսություն կլինի: Ուզում եմ 100-ամյակին ընդառաջ վերջացնել: Բայց շատ դժվար է: Կտեսնենք՝ ինչ կստացվի»,- ասաց Վարդան Ղուկասյանը:
Վերջինից հետարքրքվեցինք նաև, թե ինչո՞ւ է իր թիկնազորի ծախսերը տարիներ շարունակ հոգացել համայնքի բյուջեի հաշվին, ինչի պատճառով հերթական դատական վեճն է ծագել քաղաքապետարանի հետ: Հիշեցնենք, որ 2009-ից` Վարդան Ղուկասյանի դեմ մահափորձից հետո, երբ սպանվեցին նրա երկու թիկնապահն ու վարորդը, Վարդան Ղուկասյանը պայմանագիր է կնքել ոստիկանության պետական պահպանության գլխավոր վարչության հետ, որպեսզի ոստիկանությունը պաշտպանի իր անձի, ինչպես նաև իր տան անվտանգությունը: Այդ ծառայությունների համար, Գյումրու ավագանու որոշմամբ, համայնքային բյուջեից ամեն ամիս ոստիկանությանն է փոխանցվել 850 հազար դրամ: Ղուկասյանը, սակայն, սա ևս համարեց ապատեղեկատվություն և Բալասանյանի կողմից կազմակերպված բանսարկություն: «Դա ապուշություն է: Քանի էդ մարդը էստեղ կա, էնքան նմանատիպ բասարկություններ կհյուսվեն: Դրան սկի ոստիկանությունն ու դատախազությունը բանի տեղ չեն դնում: Ով էլ որ հանկարծ որոշի դրան պաշտպանի, ուրեմն մի այլանդակված, այլասերվածն էլ ինքն ա»:
Վարդան Ղուկասյանից հարցրինք, թե ինչպե՞ս է գնահատում Շիրակի մարզից պատգամավոր ընտրված Աշոտ Աղաբաբյանի՝ ակտիվիստներին հայհոյելու վերջին արարքը, բայց Գյումրու նախկին քաղաքապետին այնքան էլ դուր չեկավ հարցը: «Ձեզ ո՞վ է իրավունք տվել նմանատիպ մարդկանց իրար հետ կռվցնել: Անհարմար չե՞ք զգում»,- արձագանքեց Ղուկասյանը: Մեր դիտարկմանը, որ մենք պարզապես ցանկանում ենք լսել իր գնահատականը իր մարզից ընտրված պատգամավորի արարքի վերաբերյալ, Գյումրիի նախկին քաղաքապետը կրկին նետեց. «Ամո՛թ է, որ դուք ուզում եք ինձ կռվցնել սրա, նրա կամ մեկ ուրիշի հետ: Ինձ էդպիսի հարց չտաք, չեմ ուզում էդ հարցին պատասխանեմ: Ամեն մարդ գիտի՝ ինչ է անում»: