«Մենք այս փուլում թեկնածուների մասին չենք խոսել որևէ քաղաքական ուժի հետ: Մենք բերել ենք քաղաքական դաշտ մեր օրակարգը և անխտիր բոլոր դերակատար ուժերին առաջարկել ենք քննարկել՝ նա՛և հանրությանը, նա՛և Հանրապետականին: Այս առաջարկը բխում է ժողովրդի առաջ կանգնած հիմնահարցերից: Այս փուլում որևէ անձի խնդիր չենք քննարկել, բայց երբ գնում ենք բանակցությունների այլ քաղաքական ուժերի հետ, որևէ բան բացառել հնարավոր չէ»,- այս օրերին ընդդիմադիր ճամբարներում ընթացող կոնսուլտացիաների մասին ասել է ՀՅԴ Հայաստանի Գերագույն մարմնի անդամ Աղվան Վարդանյանը:
Հարցին, թե ինչպես է ՀՅԴ-ն քննարկումների սեղանի շուրջ նստում ՀԱԿ-ի հետ՝ հաշվի առնելով Լևոն Տեր-Պետրոսյանի հակադաշնակցական գործելաոճը, Աղվան Վարդանյանը պատասխանել է, որ ՀՅԴ-ի վերաբերյալ Տեր-Պետրոսյանի գնահատականը հակաքաղաքական էր, հակապետական, հակահամակարգային, բայց այսօր ունենք ռեալություններ, և առաջնորդվել ժամանակին պատահած ամենածանր դեպքերով՝ լուրջ քաղաքական ուժի անելիք չէ: Ա. Վարդանյանը նշել է, որ ՀԱԿ-ի հրապարակած «100 քայլ» ծրագրով պարզ դարձավ, որ ՀԱԿ-ի առաջ քաշած դրույթները շատ ավելի մոտեցել են ՀՅԴ տեսակետներին:
Աղվան Վարդանյանը նաև ասել է, որ իրենք բերել են 7 կետանոց փաստաթուղթ, որի չընդունումը որևէ ուժի կողմից աբսուրդ է: ՀՅԴ պահանջները բանախոսը երեք մասի է բաժանել. «Պետական կառավարման համակարգ և ժողովրդավարություն, սոցիալ-տնտեսական քաղաքականություն, արտաքին քաղաքական ուղղություններ: Այստեղ աքսիոմատիկ հստակությամբ ձևակերպված են խնդիրները»: Ըստ Ա. Վարդանյանի՝ եթե գլխավոր հարցերը չեն լուծվում, մնացածը դառնում է երկրորդական:
«Ցավոք, քաղաքական մշակույթը Հայաստանում չի կայանում: Այն օրկարգը, որ բերել է Դաշնակցությունը, կոնյունկտուրայի հետ կապ չունի: Դաշնակցությունն այն ուժն է, որ հստակ ունի իր օրակարգը: Մեզ համար քաղաքական դաշտում հավասար են բոլորը»,- ասել է ԱԺ ՀՅԴ խմբակցության անդամը:
Անդրադառնալով այն տեսակետներին, թե նախաձեռնության հետևում Հայաստանի երկրորդ նախագահն է, Վարդանյանն ասել է, որ այդ հարցերի մի մասը երկրորդ նախագահի ժամանակ ևս բարձրացվել են, և եթե նա լուծող լիներ՝ կլուծեր. «Կա՛մ կարճատեսություն է երկրորդ նախագահի ստվեր տեսնելը, կա՛մ չպատճառաբանված հեռատեսություն: Տարիների մշակումով եկել-հասել ենք այս փաստաթղթին, և թե ով ինչ կասի՝ մեր վերջին դարդն է»:
Աղվան Վարդանյանը նշել է, որ փորձել են գտնել այն «ոսկե միջինը», որի շուրջ հնարավոր է համաձայնություն կայացնել: Երկրորդ փուլում հարցը կքննարկեն հասարակության հետ, երրորդ փուլում արդեն կորոշեն ընտրության մասնակցության ձևաչափի և թեկնածուի հարցը:
ԱԺ ՀՅԴ խմբակցության քարտուղարի խոսքերով՝ ակնհայտ է, որ եթե այս ընտրությունները լինեն այնպիսին, ինչպիսին ԱԺ ընտրություններն էին, մենք պետք է 5 տարի ևս խաչ քաշենք մեր երկրի զարգացման վրա:
