Վերջերս բրիտանական The Daily Mail պարբերականը տպագրել էր Քվինսլենդի համալսարանի մասնագետ Ռոբերտ Շվեյթզերի ուսումնասիրությունը, ըստ որի՝ կանանց 33 %-ը խոստովանել է, որ սեքսից հետո հայտնվում է ընկճախտի մեջ: Գիտնականի հարցախույզին մասնակցել էր 200 կին: Շվեյթզերը կարծում է, որ վաղ է որևէ եզրակացություն անել, քանի որ «բացահայտված ֆենոմենը դեռևս դժվար է հասկանալ»:
«Նորմալ պայմաններում սեքսից հետո, ընդհակառակը, պետք է մարդ իրեն լավ զգա: Դա կապված է հոգեբանական և ֆիզիկական թուլությամբ, սակայն ոմանք բողոքում են մելանխոլիկ զգացողությունից, արտասվելուց, անհանգստությունից, գրգռվածությունից կամ անհանգստությունից»,- նշում է պարբերականը:
Այս կապակցությամբ «Առաջին լրատվական»-ը զրուցեց ԵՊԲՀ սեքսոպաթոլոգիայի կլինիկայի բժիշկ-սեքսոպաթոլոգ, սեքսոլոգիայի ամբիոնի դասախոս Վրեժ Շահրամանյանի հետ՝ փորձելով պարզել կանանց՝ սեքսից հետո լալու պատճառները:
Ըստ Վ. Շահրամանյանի՝ սեռահարաբերվելուց հետո լալու երևույթները կարող են տեղի ունենալ թե՛ դրական, թե՛ բացասական առումով: Դրական առումով՝ լացը հաճախ նկատվում է շատ զգայուն և միաժամանակ թույլ, անկայուն նյարդային համակարգ ունեցող կանանց պարագայում, ինչը բացատրվում է զգացումների այն պոռթկամբ, որը տեղի է ունենում օրգազմի ժամանակ:
«Ֆիզիոլոգիական առումով տեղի է ունենում հետևյալը. հաճելի էմոցիաների հետևանքով արյան մեջ արտադրվում է երջանկության հորմոնը` սերոտոնինը, որի չափից շատ քանակի արդյունքում լավ տրամադրությունը կարող է վերածվել սթրեսի»,- նշեց նա՝ հավելելով, թե արցունքները կարծես օգնում են կնոջն ազատվել հորմոնի ավելցուկից: Նա կանանց խորհուրդ տվեց «ոչ մի դեպքում» չզսպել արցունքները, քանի որ «խելացի և հմուտ տղամարդը» անմիջապես կհասկանա, թե ինչ մեծ երջանկություն են արտահայտում դրանք:
Ինչ վերաբերում է սեռական հարաբերությունից հետո բացասական առումով լալու անզուսպ պահանջին, ապա, ըստ սեքսոպաթոլոգի, դա դիտվում է սեռական մերձեցման ժամանակ լարվածության մեջ ընկնող և խիստ դիսկոմֆորտի զգացում ապրող կանանց պարագայում, ու նման դեպքում հարաբերությունից հետո կուտակված և չբավարարված բացասական էմոցիաները մեծ ճնշման տակ դուրս են գալիս լացի տեսքով: Բժիշկը համոզված է, որ սովորաբար, այս վիճակի գերին են դառնում այն կանայք, ովքեր անցյալում ենթարկվել են սեռական բռնության և սեքսը կապում են ապրած հոգեբանական սթրեսի, ամոթի, մեղքի, պատժի ու կորստի զգացման հետ:
Ըստ Վ. Շահրամանյանի՝ քիչ չեն այն դեպքերը, երբ կանայք սկսում են լալ սեռական հարաբերությունից հետո, քանի որ ենթադրաբար կարծում են, որ այդ կենակցումը վերջինն է, և իրենք կմնան միայնակ: «Այդ իսկ պատճառով լքվածի կարգավիճակում չհայտնվելու միտումից դրդված՝ կանայք շտապում են խզել կապերը՝ որպես հոգեբանական պաշտպանական քայլ»,- եզրափակեց բժիշկը:
