Թուրքական Enson Haber կայքի փոխանցմամբ՝ Թուրքիայում օրեր առաջ բռնկվել է հերթական խոշոր սկանդալը՝ կապված 1980 թվականի սեպտեմբերի 12-ին իրականացված ռազմական հեղաշրջման հետ: Տվյալ հեղաշրջման կազմակերպիչ, այդ ժամանակ Թուրքիայի զինված ուժերի գլխավոր շտաբի պետ, պաշտոնաթող գեներալ Քենան Էվրենի արխիվում հայտնաբերվել է անսպասելի բովանդակությամբ մի նամակ:
Նամակի վրա առկա է հեղաշրջման ժամանակ անվտանգության ծառայության պետ Ռեֆեթ Քյուչուքթիրյաքիի ստորագրությունը: Վերջինս այդ նամակը 1980-ական թվականներին ուղարկել է հեղաշրջման հետևանքով երկրի նախագահի պաշտոնը զբաղեցրած Քենան Էվրենին: Իր նամակում Քյուչուքթիրյաքին ընդգծել է, որ 16-րդ դարում 40,000 ալևի և ղզլբաշ ոչնչացրած սուլթան Սելիմ Ահեղից հետո ինքը Թուրքիայում բնակվող ալևիների ամենամեծ թշնամին է:
Նամակում նա պնդում է, որ 1976 թվականին Մալաթիայի նահանգում սպանել է նվազագույնը 40,000 ալևիների: Գեներալը նաև խոստովանում է, որ 1970-ական թվականներին Անկարայի այսպես կոչված՝ «փրկված շրջանում» նախաձեռնել է կոմպակտ բնակվող ալևիների ոչնչացումը: Ուշագրավն այն է, որ գեներալն այստեղ գործածում է soykırım բառը, որը թարգմանաբար նշանակում է ցեղասպանություն:
