Ֆրանսիայում Կանի (Կալվադոս դեպարտամենտ) դատարանը անցյալ շաբաթ արձակել է իր վճիռը «Լը Փուեն» շաբաթաթերթի դեմ Հերուվիլ Սեն Կլերի՝ ծագումով թուրք փոխքաղաքապետուհի Ֆաթիմե Էրթուղրուլ-Թասթանի ներկայացրած բողոքի մասին, որ վերաբերում էր վարկաբեկելուն: Դատարանը մերժել է բողոքը: Այս մասին գրում է Ֆրանսիայում լույս տեսնող Նոր Յառաջը:
Հարցը վերաբերում է այս տարվա հունվարի 21-ին Փարիզում Հայոց ցեղասպանության ժխտումը քրեականացնող օրինագծի դեմ թուրքերի կազմակերպած ցույցի առթիվ նշյալ շաբաթաթերթում լույս տեսած մի գրության: Դրանում խոսվում էր ֆրանսիական գաղտնի գործակալության՝ DCRI-ի մի տեղեկագրի մասին, որ վերաբերում էր թուրք ազգայնական հոսանքներին՝ գորշ գայլերին և այլն, և ասվում էր նաև, որ Ֆաթիմե Էրթուղրուլ-Թասթանն էլ անդամակցում է դրանց:
Դատավարության նիստում սեպտեմբերի 18-ին Ֆ. Էրթուղրուլ-Թասթանի փաստաբանը ասել էր, թե DCRI-ի նշյալ փաստաթուղթը կեղծ է, այն խոսում է ծայրահեղ աջերի հետ կապերի մասին և այդ պնդումներով վնաս պատճառում անձին ու պատվին իր պաշտպանյալի, որն ունի ընտրական պատասխանատվություն:
«Լը Փուեն»-ի փաստաբանն էլ իր պաշտպանական ճառում ասել էր, թե հայցվորը մասնակցել է նշյալ ցույցին, և լուսանկարներում կարելի է նրան տեսնել գորշ գայլերի խորհրդանշական հատուկ շարժումն անելու պահին: Փաստաբանը նկատել էր, որ եթե այդ ցույցի գլխավոր բնաբանն էր արտահայտվելու ազատության սկզբունքը, այս պարագայում էլ մամուլի արտահայտվելու ազատությունը պետք է հարգել: Նա կտրականապես հերքել էր նաև այն պնդումը, թե DCRI-ին վերագրված՝ խնդրո առարկա փաստաթուղթը կեղծ էր:
